Əjdər Ağayev: "Abituriyentlərin dövlət universitetlərində təhsil almaq arzusu özəl təhsil müəssisələrində boş plan yerlərinin qalmasına səbəb olur"
Bu il Azərbaycanda özəl ali məktəblərə qəbul olunan (I mərhələ üzrə) abituriyentlərin və boş qalan plan yerlərinin sayı açıqlanıb. Dövlət İmtahan Mərkəzindən medianın sorğusuna cavab olaraq bildirilib ki, 2017/2018-ci tədris ili üzrə 6245 plan yerinə 3666 nəfər qəbul olunub. Onlardan 3506-sı Azərbaycan, 160-ı rus bölməsinin məzunlarıdır.
Özəl ali məktəblərə qəbul olunan 3666 nəfərin 437-si I, 1665-i II, 1408-i III, 108-i IV, 48-i isə V ixtisas qrupunu seçib.
Bu il özəl ali təhsil müəssisələrinə qəbulolma faizi 58.70 % olub (44.82 %-i I, 52.61 faizi II, 81.39 %-i III, 40.00 %-i IV, 45.71 %-i isə V qrup üzrə).
Məlumat üçün bildirək ki, qəbul imtahanlarının I mərhələsinin nəticələrinə əsasən, özəl ali məktəblərdə 2579 (41.30 %) vakant yer qalıb.
Özəl ali təhsil müəssisələrində 40 faiz boş yer qalmasına münasibət bildirən təhsil eksperti Əjdər Ağayev "Bakı-Xəbər"ə açıqlamasında qeyd etdi ki, bunun bir neçə səbəbi var: "İlkin olaraq qeyd edim ki, təhsil haqqının yüksək olması tələbə sayına təsir edib. Tək özəl universitetlərdə deyil, həmçinin, dövlət ali təhsil müəssisələrində də təhsil haqqı yüksəkdir".
Həmsöhbətimiz digər səbəbi kimi, abituriyentlərin dövlət təhsil müəssisəsinə qəbul olunmaq arzusunda olmasını göstərdi: "Abituriyentlər ixtisas seçimi zamanı ilk sırada dövlət universitetlərini qeyd edirlər. Daha sonra özəl ali məktəblərin adını yazırlar.
Həmçinin, abituriyentlərin düzgün ixtisas seçə bilməməsi onların heç bir universitetə qəbul olunmamasına səbəb olur. Elə abituriyentlər var ki, onların topladığı bal özəl ali təhsil müəssisəsinə uyğun gəldiyi halda, o, dövlət universitetini yazıb. Belə olan halda, həmin gənc kənarda qalır. Düzgün ixtisas seçimi edərdisə, o şəxs özəl ali məktəbin tələbəsi olardı".
Ə.Ağayevin sözlərinə görə, keçid balının yüksək olması da özəl universitetlərin boş qalmasına təsir edib. Bir qisim abituriyent keçid balını keçə bilmədiyi üçün, özəl ali məktəblər boş qalıb.
Günel CƏLİLOVA
