Fikrət Sadıqov: "Hər halda, Rusiyaya oxumağa gedən tələbələrin sayı artırsa, bu, iki ölkə arasında münasibətlərin göstəricisidir"
"Rusiyada təhsil alan azərbaycanlı tələbələrin sayı ilbəil artır". Bunu mətbuata açıqlamasında Rusiyanın Azərbaycandakı səfiri Vladimir Doroxin Rusiyaya yollanacaq azərbaycanlı tələbələrlə görüş zamanı deyib.
Səfir bildirib ki, Rusiya-Azərbaycan münasibətləri bu gün bir çox sahələri əhatə edir. Onun fikrincə, Sovet İttifaqı dağıldıqdan sonra iki ölkə arasında təhsil sahəsində münasibətlər pozuldu, tələbələrin axını dayandı: "Biz daha sonra bunu bərpa edə bildik. 2009-cu ildə Rusiya Federasiya büdcəsi hesabına dövlət təqaüdü proqramı bərpa olundu. Həmin il 123 tələbə Rusiyaya göndərildi. Bu rəqəmlər ilbəil artır və biz bu il 201 tələbəni Rusiya göndəririk. Lakin bu, son rəqəm deyil. Öz hesabına və sponsorlar hesabına Rusiyada təhsil alanların sayı da çoxdur. Ümumilikdə, Rusiyada bu gün 15 min Azərbaycan vətəndaşı təhsil alır. Rusiya hələ də Azərbaycanda kadrların hazırlanmasında vacib beynəlxalq mərkəzlərdən biri hesab olunur".
Səfir açıqlamasında onu da qeyd edib ki, bu tələbələr 900 nəfər içərisindən seçilib: "Seçilən 201 nəfərdən 34-ü tibb sahəsində, 31-i iqtisadiyyat və idarəetmə, 12 nəfər dil və ədəbiyyat, 10 nəfər siyasi elmlər və regionşünaslıq sahələrində təhsil alacaqlar. Onlardan 88 nəfəri Moskvada, 10 nəfəri Sankt-Peterburq və digər regionlardakı universitetlərə daxil olublar. 105 nəfər bakalavr, 20 nəfər spesialitet, 53 nəfər magistr, 17 nəfər ordinatura və 7 nəfər aspirantura təhsili alacaqlar".
Bütün bu deyilənlərin fonunda, Rusiyada təhsil alan azərbaycanlı tələbələrin sayının artması nəyin göstəricisidir?
Məsələyə münasibət bildirən politoloq Fikrət Sadıqov bunu iki ölkə arasında olan yaxın münasibətlərlə əlaqələndirdi: "Düzdür, Azərbaycandan Rusiyaya oxumağa gedən tələbələr var. Ancaq bu tələbələrin sayının ilbəil artmasını demək çətindir. Çünki xarici ölkələrə oxumağa gedən tələbələr əsasən Avropa ölkələrinə və Türkiyəyə üstünlük verir. Hər halda, Rusiyaya oxumağa gedən tələbələrin sayı artırsa, bu, iki ölkə arasında münasibətlərin göstəricisidir. Biz iki ölkə arasında münasibətləri strateji partnyorluq səviyyəsində qururuq. Bu bizim əsas prioritet vəzifəmizdir. Bir şeyi də nəzərə almaq lazımdır ki, Rusiya Azərbaycanla yaxın qonşudur. İki ölkə arasında uzun illərə dayanan münasibətlər var. Rusiyada çoxlu sayda azərbaycanlı yaşayır. Onların bir qismi məhz Rusiya vətəndaşıdır. Sovet dönəmində çoxsaylı azərbaycanlı Rusiyanın müxtəlif ali məktəblərində təhsil alıblar".
Vidadi ORDAHALLI
