Adil Qeybulla: "Ürək xəstəliklərinin cavanlaşması səbəbləri sosial faktorlar, ətraf mühit, ekoloji amillər və son illər artan psixo-emosional gərginlikdir"
Azərbaycanda hər il müxtəlif səbəblərdən ölümlər qeydə alınır. Araşdırmalara görə, son vaxtlar bəzi xəstəliklər xeyli cavanlaşıb və onlardan ölənlər daha çoxdur.
Son illər Azərbaycanda bəzi xəstəliklərin cavanlaşdığı bildirilir. Qeyd olunur ki, adətən ən çox ürək xəstəlikləri, hipertoniya, yəni qan təzyiqinin artımı, onkoloji xəstəliklər ölüm hallarına səbəb olur.
Statistik məlumatlara görə, kardioloji xəstəliklər - ürək çatışmazlığı, insult kimi hallar artıq onkoloji xəstəlikləri də üstələyir. Qeyd olunan xəstəliklər artıq cavanlaşıb. Belə ki, gənclərdə, orta yaşlı insanlarda həmin xəstəlikləri müşahidə etmək mümkündür. Əvvəllər bu cür xəstəliklər 50 yaşdan yuxarı insanlar üçün xarakterik idisə, indi belə deyil.
Ürək çatışmazlığı və insult xəstəliklərinin cavanlaşması barədə fikir bildirən professor, həkim-ekspert Adil Qeybulla "Bakı-Xəbər"ə açıqlamasında qeyd etdi ki, bunun əsas səbəbləri sosial faktorlar, ətraf mühit, ekoloji amillər və son illər artan psixo-emosional gərginlikdir: "Ürəyin işemik xəstəliyi bu gün səhiyyənin, tibbin inkişafına baxmayaraq, bütün dünyada ölümə və əlilliyə səbəb olan xəstəliklər arasında birinci sıradıdar. Bu xəstəliyin əlamətləri müxtəlif cür olur. Bəzi xəstələrdə çox sadə ağrı şəklində olur. Və onu da qeyd edim ki, ürək ağrısı çox vaxt solda, sol döşü üstündə olan ağrı deyil. Klassik, tipik ürək ağrısı ortada, sinədə sinə sümüyünün arxasında yandırıcı, sıxıcı tərzdə olan ağrıdır".
İnsult xəstəliyinin cavanlaşmasına gəlincə, həmsöhbətimmz bildirdi ki, insanların sağlamlığına laqeyd yanaşması, qidalanma və stress problemi buna gətirib çıxarır: "Qan dövranı ilə bağlı olan xəstəliklər, ürək-damar sistemi narahatlıqları ətraf mühit problemləri, insanların iş üslubunun, yaşam tərzinin dəyişikliyi səbəbindən artır. Qidalanma sisteminin qeyri-düzgün təşkil edilməsi, ayaqüstü, yarımfabrikat şəklində hazırlanmış qidaların qəbulu, üstəgəl, oturaq həyat tərzinin çox olması da əsas səbəblər sırasındadır. Yaşlandıqca, insanların damar problemləri artır. Ən önəmli səbəb hormonal disbalansın yaranmasıdır. Beləliklə, orqanik və psixosomatik dəyişikliklər, eyni zamanda ətraf mühitin təsiri ilə insanlarda insult kimi xəstəliklərin yaşı cavanlaşmağa doğru gedir".
Həmsöhbətimiz onu da əlavə etdi ki, son zamanlar insanlar arasında beynin qan-damar xəstəliklərindən əziyyət çəkənlərin sayı xeyli artıb: "Beynində qan-damar xəstəlikləri olanların bir qismi dünyasını dəyişir, əksər hissəsi isə əlil qalır. Beyində damar pozğunluğunun əmələ gəlməsində hipertoniyanın, arterial hipertoniyanın, ürək xəstəliklərinin, revmatizm nəticəsində törəyən infeksion virusların, anadangəlmə damar anomaliyalarının, psixi və fiziki gərginliyin, alkoqolizmin rolu böyükdür. Beynin qan-damar xəstəlikləri kəskin olur və tədricən şiddətlənir".
Günel CƏLİLOVA
