Kamran Əsədov: "Təhsil Nazirliyi və Dövlət İmtahan Mərkəzi bu məsələyə müdaxilə etməlidir ki, biz bu şəxsləri itirməyək"
Bu il qəbul imtahanlarında iştirak edən tələbələrin əksəriyyəti yüksək bal toplayıb. Ancaq təəssüf ki, yüksək bal toplayanlardan bəzisi ali məktəbə qəbul olunmayıb. 600-dən yuxarı bal toplayan 4 nəfər ali təhsil müəssisələrinə qəbul olunmayıb.
Belə yüksək bal toplayıb ali məktəbə qəbul olunmayanlar üçün hər hansı bir istisna hal olmalıdır ki, o tələbələr depressiyaya düşməsinlər. Təhsil eksperti Kamran Əsədov "Bakı-Xəbər"ə açıqlamasında qeyd etdi ki, bəzi gənclərin yüksək bal toplasa da, ali məktəbə qəbul oluna bilməməsi təəssüf doğurur: "Ancaq belə olan halda, onlara müəyyən şərait yaradılmalıdır. Təəssüf ki, Dövlət İmtahan Mərkəzinin nizamnaməsində və "Təhsil haqqında" Qanunda göstərilməyib ki, tələbləri yüksək şəkildə yerinə yetirən, lakin ixtisas seçimi zamanı ali məktəbə qəbul oluna bilməyən şəxslərə hansısa güzəşt olmalıdır. Ancaq hesab edirəm ki, aidiyyəti qurumların müdaxiləsi nəticəsində o şəxslər mütləq şəkildə tələbə adını qazanmalıdırlar. Bu gün biz sevinə-sevinə deyirik ki, 650-dən yuxarı bal toplayan abituriyentlərin sayı artıb və 2500 nəfərə çatıb. Bu tələbələr o siyahının içərisindədir. III qrupda iki nəfər 669, IV qrupda 640 və 620 bal toplayan gənclər ali məktəbə qəbul olunmayıblar. Əlbəttə, onlar ixtisas seçimi zamanı əvvəlki illərin statistik göstəricilərinə əsasən belə seçim ediblər. Ancaq bu o demək deyil ki, onlar kənarda qalmalıdır. Nəzərə almaq lazımdır ki, o gənclər yüksək qabiliyyətə malik olan şəxslərdir. Hesab edirəm ki, keçmiş təcrübədən yararlanaraq, onlara şərait yaradılmalıdır. Xatırladım ki, 2014-cü ildə də belə bir hadisə baş vermişdi. 643 bal toplayan bir xanım kənarda qalmışdı. Həmin ərəfədə fəaliyyət göstərən Tələbə Qəbulu üzər Dövlət Komissiyasının rəhbəri həmin şəxsin istədiyi ixtisasa qəbul olunmasına şərait yaratdı. Həm Təhsil Nazirliyi, həm də Dövlət İmtahan Mərkəzi bu məsələyə müdaxilə etməlidirlər. Biz bu şəxsləri itirməli deyilik. Bəllidir ki, Türkiyə universitetləri 600-dən yuxarı bal toplayanları ödənişsiz təhsilə cəlb edirlər. Bu səbəbdən də biz həmin gəncləri itirməmək üçün onlara şərait yaratmalıyıq".
Həmsöhbətimiz təklif edir ki, 650-dən yuxarı bal toplayanlar ixtisas seçiminə buraxılmasın, onlar birbaşa istədikləri ixtisasa qəbul olunsunlar. Necə ki, beynəlxalq yarışların qaliblərini imtahandankənar həmin ixtisas üzrə qəbul edirik. Eyni hal yüksək bal toplayanlara da şamil olunmalıdır.
Günel CƏLİLOVA
