Bahadur Bilalov: "Qonşu dövlət olaraq xaricə gedən rus turistlərinin 10 faizini cəlb edə bilsək, bu, ildə 2 milyon nəfər turist deməkdir"
Azərbaycana qrup şəklində gələn turistlərin sayı artıb. Bunu mətbuata açıqlamasında Azərbaycan Turizm Assosiasiyası (AzTA) sədrinin müşaviri Müzəffər Ağakərimov bildirib.
Onun sözlərinə görə, 5-10 il əvvəl Rusiyadan Azərbaycana az sayda turist gəlirdi. Gələn turistlər isə əsasən Bilgəh qəsəbəsində və Nabranda qalırdılar: "Ancaq indi Rusiyadan Azərbaycana çoxlu turist gəlir. Bu, Azərbaycan və Rusiyanın keçirdiyi müxtəlif tədbirlərin nəticəsidir".
M.Ağakərimov Azərbaycanın turizm sektoru üçün Rusiya bazarının daha da genişləndirilməsini vacib hesab edir. Onun sözlərinə görə, hazırda Azərbaycana ərəb ölkələrindən, İrandan daha çox turist gəlir. Qazaxıstandan isə müalicə turizmi üçün gələnlərin sayı çoxalıb: "Azərbaycana Yaponiyadan, Cənubi Koreyadan da turistlər gəlir. Onlar elə 1990-cı illərdən Azərbaycanı tanımağa başlayıblar".
AzTA rəsmisi onu da əlavə edib ki, Azərbaycanda daxili turizmin inkişafı yüksələn xətlə gedir. Əvvəllər yayda regionlardakı otellərdə yer tapmaq olurdu. Ancaq indi, xüsusilə şənbə-bazar günlərində yer tapmaq çətinləşib.
AzTA rəsmisi hesab edir ki, əvvəllər Azərbaycandan Fransa, Almaniya, Çexiyaya dincəlmək üçün gedənlərin sayı çox olsa da, indi bu rəqəm azalıb.
Bütün bu deyilənlərin fonunda, Azərbaycana qrup şəklində gələn turistlərin sayının artmasının kökündə nə dayanır?
Məsələyə münasibət bildirən turizm sahəsi üzrə ekspert Bahadur Bilalovun sözlərinə görə, bu, Rusiyadan Azərbaycana kütləvi şəkildə turist axını deməkdir: "Azərbaycan daha çox turist cəlb etmək üçün müxtəlif ölkələrdə iş aparır. O ölkələrdən biri də Rusiyadır. Rusiya qonşu ölkədir və hər il dünya turizm bazarına 20 milyon nəfərdən çox turist göndərir. Yəni bu o deməkdir ki, hər il 20 milyon nəfərdən çox Rusiya vətəndaşı xarici ölkələrə səfərə gedir. Uzun müddətdir ekspert olaraq belə bir təkliflə çıxış edirdik ki, Azərbaycan qonşu Rusiya ilə xüsusi iş aparsın. Rusiya bazarı ilə işləməliyik. Ona görə ki, qonşu dövlət olaraq xaricə gedən rus turistlərinin 10 faizini cəlb edə bilsək, bu, ildə 2 milyon nəfər turist deməkdir. Bu nöqteyi-nəzərdən artıq Mədəniyyət və Turizm Nazirliyi Rusiyada bu işlərlə məşğul olmağa ciddi önəm verməyə başlayıb. Bu da öz nəticəsini verməkdədir. Yəni bir neçə il əvvəl Rusiyadan ancaq fərdi turistlər gəlirdisə, indi artıq qrup şəklində turistlər gəlir. Turizm şirkətləri qruplar formalaşdırır və bu minvalla onların gəlməsi təmin olunur. Bu da, əslində, Rusiyadan Azərbaycana kütləvi turist axınının başlanması deməkdir. Düşünürəm ki, növbəti illərdə belə qrupların sayı daha da artacaq".
Vidadi ORDAHALLI
