Fatimə Hacıbəyli: "Bu cinayəti törədənlərə elə cəza verilməlidir ki..."
Son zamanlar mediada seksual zorakılıq hadisələrinin tez-tez işıqlandırılmasının şahidi oluruq. Demək olar ki, bir ay ərzində azyaşlı uşaqların zorlanması, gənc qızların təcavüzə məruz qalması haqqında məlumatlara müntəzəm rast gəlirik.
Əslində, zorlanma haqqında yayılan istənilən növ xəbər insanı vahiməyə salır. İstər azyaşlı olsun, istərsə də dolğun bir şəxsin qarşı cins tərəfindən zorakılığa məruz qalması xəbərləri ictimaiyyəti ciddi narahat edir. Yaşından asılı olmayaraq, istənilən bir şəxsin zorlanması hadisəsindən xəbər tutan şəxsin bunu ört-basdır etməsi düzgün deyil.
Ekspertlər təklif edir ki, zorlayan şəxs daxil olmaqla, bu hadisənin ört-basdır edilməsində əli olan şəxslərə də sərt cəza verilsin. Hətta bu cinayəti törədən şəxslərin ömürlük həbs olunması deyil, ya güllələnməsi, ya da axtalanması kimi cəzalandırma metodlarını təklif edənlər də var. Belə fikirlər səsləndirilir ki, bu cür amansız cinayəti törədənlərə olduqca sərt cəza verilsə, bu, digərlərinə də dərs olar.
"Vəfa" Sosial İctimai Birliyinin rəhbəri Fatimə Hacıbəyli "Bakı-Xəbər"ə açıqlamasında qeyd etdi ki, son zamanlar baş verən zorlanma hadisələri vəziyyətin pik nöqtəyə çatmasından xəbər verir. Artıq aidiyyəti qurumlar məlum vəziyyətlə bağlı SOS siqnalı verməlidir: "Yaşından asılı olmayaraq, bir qadının zorlanması qəbul olunan deyil. Xüsusən də söhbət uşaq və ya yeniyetmədən gedirsə, bu böyük faciədir".
Həmsöhbətimizin sözlərinə görə, öncə zorlanmanın səbəbləri axtarılmalıdır: "Günahı tək zorlayan şəxsdə deyil, onun ətrafında, valideynlərində, dost-tanışında axtarmaq lazımdır. Ola bilər ki, həmin şəxs uşaq vaxtı ailəsində müxtəlif növ zorakılıq faktı ilə üzləşib. Bu hal onun psixikasına təsir edib və illər sonra yaşadığının əvəzini hansısa qadından və ya məktəb yaşlı uşaqdan çıxmaq istəyir".
Müsahibimizin fikrincə, maddi dəyərlərin cəmiyyətdə əsas rola çevrilməsi mənəvi dəyərləri təzyiqə salır. Bu üzdən xoşagəlməz hadisələr qeydə alınır.
Birlik sədri onu da vurğuladı ki, Beyləqanda qeydə alınan zorakılıq hadisəsi olduqca acınacaqlıdır: "Ağrılı məqam ondan ibarətdir ki, hadisədən xəbər tutan hər bir kəs susub, zorlayanı deyil, zorlananı ittiham ediblər. İstər qızın valideynləri, istərsə də əks cinsin doğmaları və vəziyyətdən xəbəri olan kənd əhli qurbanı ittiham etmək əvəzinə polisə müraciət etməli idilər. Qızı kənddən qovmaqla və ya onu öldürməklə bu cür hadisələrə son qoyulmayacaq. Əksinə, daha da artacaq. İyrənc hadisəni törədən şəxs özünü qəhrəman sanacaq və bir çox gənc onun kimi olmaq istəyinə düşəcək. Bax o zaman nə qədər ana ağlar qalacaq və qızlarımız isə intihar yolları axtaracaqlar. Bu üzdən, baş verən hadisə barəsində vaxtında aidiyyəti qurumlara müraciət etmək lazımdır ki, gələcəkdə buna bənzər hadisələr yaşanmasın".
F.Hacıbəylinin sözlərinə görə, zorlanma hadisəsini törədən şəxslərin ömürlük həbs cəzası ilə cəzalandırılması düzgün deyil: "Onlar üçün bu cəza yüngül cəza sayılır. Bu cinayəti törədənlərə elə cəza verilməlidir ki, hər kəs onların törətdiyi əməldən xəbərdar olsun. Qoy cəmiyyətdə hamı onun necə biri olduğunu bilsin".
Günel CƏLİLOVA
