Avqustun 8-də Xəzər televiziyasının "Xəzər-xəbər" proqramında "İmişlidə inəyə ekskovatorla işgəncə verdilər" adlı videosüjetdə bir qrup şəxsin inəyi buynuzundan ekskovatorun çömçəsinə bağlayaraq su kanalına salmaları, heyvana əzab verərək onu suda o tərəf-bu tərəfə fırlatmaları əks olunub.
Videosüjetlə əlaqədar İmişli Rayon Polis Şöbəsində araşdırma aparılıb. Müəyyən edilib ki, həqiqətən də belə bir hadisə iyun ayının axırlarında rayonun Cahan kəndində baş verib.
Həmin vaxt orada olan kənd sakini Atamoğlan Nuriyev və Gövhərli kənd sakini Fərman Əzimov Rayon Polis Şöbəsinə dəvət edilərək izahatları alınıb.
Müəyyən edilib ki, həmin vaxt rayonun Cahar kənd sakini Atamoğlan Nuriyevə məxsus inək çirkab suların dolduğu kanala düşüb. Sahibi, pis qoxu gəldiyi üçün su ilə yusa belə, onun kirinin getməyəcəyini və balası olan heyvanı bu vəziyyətdə evə aparmağın mümkün olmadığını görüb, traktoru olan yaxın qohumu Fərman Əzimovdan inəyi yaxınlıqdakı göldə yumaq üçün kömək istəyib.
Onlar inəyi "T-28" markalı traktorun qovuşuna bağlayaraq heç bir zərər və xəsarət yetirmədən göldə yuyulması üçün bir-iki dəfə sağa-sola çəkərək hərəkət etdiriblər.
Lakin yayımlanan görüntülər dəfələrlə təkrarlandığından, bu, seyrçilərdə işgəncə təəssüratı yaradaraq hiddət və qəzəb oyadıb.
Atamoğlan Nuriyev və Fərman Əzimov barəsində İnzibati Xətalar Məcəlləsinin 290.1.9-cu (ev heyvanı saxlayan və ya ona baxan şəxs tərəfindən ev heyvanlarına müvafiq icra hakimiyyəti orqanının müəyyən etdiyi qaydada nəzərdə tutulmuş qayğıların göstərilməməsinə görə) maddəsinə uyğun olaraq protokol tərtib olunub.
Natiq CAVADOV, DİN mətbuat xidmətinin əməkdaşı
