Son illər respublikamızda tibbi xidmətinin səviyyəsi əhalini razı salır. Yeni müasir sağlamlıq ocaqlarında insanların sağlamlığını etibarlı qorumaq üçün hər bir şərait yaradılıb. Bu da ondan irəli gəlir ki, ölkəmizdə vətəndaşların sağlam həyat yaşaması həqiqətən də dövlət tərəfindən prioritet məsələdir.
Səhiyyədə aparılan islahatlar, dəyişikliklər onun bütün strukturlarının normal işinə yaxşı imkan verir. Necə deyərlər, gözəl şərait, müasir xidmət xəstəxanalara olan inamını dahim artırır. Qayğı və diqqətin nəticəsidir ki, hazırda hətta ən ucqar dağ kəndlərində belə səhiyyə xidməti müasir tələblərə tam şəkildə cavab verir, ən əsası, xəstələr uzağa getmədən yaşadığı doğma yerdə yüksək ixtisaslı tibbi yardım, dəqiq müalicə alırlar.
Bu baxımdan dağ rayonu olan Lerikdə də əhalinin sağlamlığına hərtərəfli xüsusi qayğı var. Burada yerləşən tibb müəssisələrin fəaliyyəti olduqca ürəkaçandır. Həm də səhiyyə xidmətini daha da yüksəlməsi üçün müntəzəm, düşünülmüş təsirli tədbirlər hazırlanıb həyata keçirilir. Sevindirici haldır ki, indi rayonun özündə keyfiyyətli müalicə almaqdan ötrü maksimum şərait yaradılıb. Dağlar diyarında elə xəstəxana yoxdur ki, müasir tibbi avadanlıqları olmasın. Yaradılan vəziyyətdən yetərincə yaraqlanan sağlamlıq keşikçiləri istənilən xəstəliyi vaxtında aşkara çıxarır, onun düzgün müalicəsini apara bilirlər. Nəticədə heç kim xəstəxanadan evinə ümidsiz qayıtmır. Odur ki, leriklilər insanların sağlamlığı keşiyində duranları hər yerdə, hər zaman böyük hörmətlə qarşılayır.
Lerikdə tibbi xidmətin səviyyəsinin günü-gündən yüksəlməsində baş həkim Mübariz Ağayevin əməyi daha tərifəlayiqdir. O, 2009-cu ildən bu vəzifədə çalışır. Xalqına, vətəninə bağlı olan Mübariz həkim öz peşəsini ürəkdən sevir, vəzifə borcunu vicdanla yerin yetirir. Onu da deyim ki, ali təhsildən sonra o, az müddət Bakı şəhərində çalışıb, elmi sahədə uğur qazanmış və hazırda tibb elmləri üzrə fəlsəfə doktorudur. Mübarizin şəfalı əlləri çoxuna ikinci həyat verib. Əməyi isə dövlət tərəfindən də qiymətləndirilib - "Səhiyyə əlaçısı" adına layiq görülüb. Mübariz Ağayev insanlara nümunəvi xidmət göstərdiyi kimi, ətrafına yığdığı həkim və orta tibb işçilərdən də bunu istəyir. Buna görə də Lerikin tibb işçiləri insanların sağlamlığını keyfiyyətlə təmin etmək üçün peşələrinə sədaqətlə yanaşır, işlərini layiqincə görürlər. Dövlət qayğısı isə onlara xidmətin səviyyəsini yüksəltməyə əlavə stimul verir. O deyir: - Azərbaycan səhiyyəsi dinamik inkişaf yolundadır. Bu rayonumuzun timsalında da aydın görünür. Bu gün əhalinin sağlamlığını qorumaq məqsədilə rayonda 78 səhiyyə müəssisəsi, o cümlədən 1 rayon, 6 kənd xəstəxanası, 19 həkim, 51 tibb məntəqəsi fəaliyyət göstərir. Tibb ocaqlarında 56 nəfər həkim, 182 nəfər orta tibb işçisi çalışır. Ən əvvəl onların nəzəri bilik səviyyəsinin artırılması həmişə nəzarət altındadır. Xəstəxanalarda gözəl şərait olduğuna görə bütün işlər də yaxşı alınır. Rayonun səhiyyə sistemində müəyyən yenidənqurma işləri aparılıb, maddi-texniki baza xeyli möhkəmlənib. Bütün avadanlıqlar müasirdir, dərman sarıdan heç bir problem olmur. Ən böyük nailiyyət isə Dövlət Proqramına uyğun olaraq rayon mərkəzi xəstəxanasının yüksək səviyyədə təmir edilməsidir. Yenidənqurma nəticəsində sağlamlıq ocağının funksionallığı artıb, indi burada qəbul, cərrahiyyə, reanimasiya, terapiya, stomatologiya, mamalıq- ginekologiya, yoluxucu xəstəliklər, poliklinika, uşaq şöbələri, laboratoriya, təcili tibbi yardım və aptek əhalinin sağlamlığına xidmət edir.
Bir sözlə, dağlar diyarı Lerikdə dövlətin qayğısı hesabına tibb müəssisələri normal işləyir, Hippokrat andı içənlər bacarıq və biliklərini sərf etməklə əhalinin sağlamlığını etibarlı şəkildə qoruyur...
Zəfər ORUCOĞLU, Azərbaycan Jurnalistlər Birliyinin üzvü (Lerik rayonu).
