Eyyub Hüseynov: "Mən dəfələrlə təklif etmişəm ki, siqaretdən imtina etmək üçün ilk növbədə onun satış qiyməti 4-5 dəfə qaldırılsın"
Siqaretin insan səhhətinə zərərləri barədə dəfələrlə ictimaiyyətə məlumat verilib. Lakin bu zərərli vərdişdən insanlar uzaq durmaq istəmir. Hətta siqaretin insan səhhətinə zərəri barədə Prezident İlham Əliyev də fikirlərini bildirib. İ.Əliyev bu barədə Qaxda barama, tütün və fındıq istehsalının inkişafı məsələlərinə dair respublika müşavirəsində çıxış edib.
O qeyd edib ki, əsas vəzifələrdən biri də odur ki, Azərbaycanda siqaret istehsalı daha da artsın: "Mən bunu əvvəllər də demişəm, bu gün də deyirəm, biz elə etməliyik ki, Azərbaycan vətəndaşları az siqaret çəksinlər. Çünki bu, zərərli vərdişdir və insanın sağlamlığına çox böyük təhlükələr, problemlər yaradır. Ona görə müvafiq tədbirlər görüləcək ki, Azərbaycan vətəndaşları bu vərdişdən tədricən əl çəksinlər".
Maraqlıdır, necə etmək lazımdır ki, insanlar az siqaret çəksin və ya ümumiyyətlə, bu vərdişdən tamamilə uzaqlaşsınlar?
Azad İstehlakçılar Birliyinin (AİB) sədri Eyyub Hüseynov "Bakı-Xəbər"ə açıqlamasında qeyd etdi ki, insanların siqaretdən uzaqlaşması üçün öncə maarifləndirmə işi aparmaq lazımdır: "Nəzərə almaq lazımdır ki, bu gün bazarda insan sağlamlığı üçün təhlükəli olan siqaretlər var. O siqaretlər qanunsuz şəkildə istehsal olunur. Mən sizə deyim ki, "Azeri" korporasiyasının istehsal etdiyi siqaretlərin tərkibini araşdırdıq və məlum oldu ki, tərkibində təhlükəli maddələrin miqdarı 67 faizdən çoxdur. Belə olan halda, Səhiyyə Nazirliyi həmin siqaretə verdiyi sertifikatı geri götürdü. Ancaq buna baxmayaraq, bu gün də "Piramida", "Karvan" və "Şəki" siqaretləri adıçəkilən bölgədə istehsal olunur. Və nəinki Şəki, Balakən, Qax, hətta paytaxtın Süleyman Rəhimov küçəsi 188 ünvanında satılır. Bu cür siqaretlərdən istifadə edənlər ciddi xəstəliyə tutulur. Ölkə başçısının siqaretin insan sağlamlığına vurduğu zərərlərlə bağlı iradı yerində deyilib".
Həmsöhbətimizin sözlərinə görə, Prezident İ.Əliyevin əhalinin sağlamlığına yönəlmiş fikirləri var. Lakin müvafiq qurumlar öz imzalarına hörmət etmək üçün iş görmürlər.
E.Hüseynov bildirdi ki, siqaretdən birdəfəlik imtina etmək lazımdır. Siqaret məişət narkomaniyasıdır. Filtrli, filtrsiz və layt siqaretləri insan səhhəti üçün təhlükəlidir.
Birlik sədrinin fikrincə, ölkə başçısının siqaretdən imtina kampaniyasına ictimai dəstək vermək lazımdır: "Ailələrlə orta məktəblər bir araya gəlib siqaretin zərərləri haqqında mütəmadi olaraq uşaqlara məlumat verməlidirlər. Mən dəfələrlə təklif etmişəm ki, siqaretdən imtina etmək üçün ilk növbədə onun satış qiyməti 4-5 dəfə qaldırılsın. Qiymət yüksək olarsa, insanlar siqaret almağa meyl etməz".
Günel CƏLİLOVA
