Aytəkin Kamranqızı: "Məişət zorakılığından zərər çəkən şəxslərin sosial müdafiəsi, hüquqi yardımla təmin olunması sevindiricidir"
"Məişət zorakılığının qarşısının alınması haqqında" Qanuna dəyişiklik təsdiqlənib. Bununla bağlı sənədi Prezident İlham Əliyev imzalayıb.
Bu qanun yaxın qohumluq münasibətlərindən, birgə və ya əvvəllər birgə yaşayışdan sui-istifadə etməklə törədilən zorakılığın, onun doğurduğu mənfi hüquqi, tibbi və sosial nəticələrin qarşısının alınması, məişət zorakılığından zərər çəkmiş şəxslərin sosial müdafiəsi, hüquqi yardımla təmin edilməsi, habelə məişət zorakılığına səbəb olan halların aradan qaldırılması istiqamətində həyata keçirilən tədbirləri müəyyən edir və tənzimləyir.
Dəyişikliklə qanunun 12.4-cü maddəsi yeni redaksiyada verilir. Belə ki, yeniliyə əsasən, uzunmüddətli mühafizə orderinin verilməsi barədə məhkəmə qərarı dərhal icraya yönəldiləcək və həmin vaxtdan uzunmüddətli mühafizə orderinin müddəti hesablanacaq.
Qeyd edək ki, indiyədək isə maddə belə idi: "Uzunmüddətli mühafizə orderinin verilməsi barədə məhkəmə qərarı qanunvericiliyə uyğun olaraq qüvvəyə minir və müddəti hesablanır. Uzunmüddətli mühafizə orderinin verilməsi barədə qərar qanunvericiliyə uyğun olaraq icraya yönəldilir".
Qanuna edilən dəyişiklik barədə fikir bildirən sosioloq Aytəkin Kamranqızı bizimlə söhbətində qeyd etdi ki, bu dəyişikliyin olması gözlənilirdi.
Həmsöhbətimizin sözlərinə görə, məişət zorakılığından zərər çəkən şəxslərin sosial müdafiəsi, hüquqi yardımla təmin olunması sevindiricidir: "Bəllidir ki, əvvəllər məişət zorakılığından əziyyət çəkənlər nə sosial qayğı ilə təmin olunurdu, nə də hüquqi yardım ala bilirdi. Bir tək vətəndaş cəmiyyəti onları müdafiə edirdi. Bu da, təbii ki, onların maddi durumunun imkan verdiyi müddətə qədər. Ancaq indi vəziyyət fərqli olacaq. Məişət zorakılığından əziyyət çəkənlər aidiyyəti qurumlara müraciət edəcək, onların sosial və hüquqi müdafiəsi təmin olunacaq. Yoldaşı, atası və ya yaxınlarından kiminsə tərəfindən şiddətə məruz qalan şəxs dövlətə sığınacaq. Onun sosial yaşayışı, təhsil alması, işlə təmin olunması məsələsində hər hansı bir problem qeydə alınmayacaq".
Sosioloq onu da vurğuladı ki, qanuna edilən dəyişikliyə əsasən, məişət zorakılığına səbəb olan amillər aradan qaldırılacaq.
Günel CƏLİLOVA
