Əjdər Ağayev: "Məktəblər bina və texniki imkan baxımından təkmilləşdikcə, məktəbəhazırlıq qrupları digər tədris müəssisələrini də əhatə edəcək"
Respublika üzrə məktəbəhazırlıq qruplarının fəaliyyət göstərəcəyi ümumtəhsil müəssisələrinin sayı açıqlanıb. Bu il məktəbəhazırlıq qruplarında oxuyacaq uşaqların və təhsil müəssisələrinin sayı da artırılıb.
Yeni tədris ilində Bakıda 266, Abşeronda 39, Ağcabədidə 62, Ağdaşda 33, Ağstafada 30, Ağsuda 24, Astarada 48, Balakəndə 38, Beyləqanda 31, Bərdədə 48, Biləsuvarda 34, Cəlilabadda 66, Daşkəsəndə 9, Gədəbəydə 38, Gəncədə 44, Goranboyda 62, Göyçayda 50, Göygöldə 20, Hacıqabulda 25, İmişlidə 55 ümumtəhsil müəssisəsində məktəbəhazırlıq qrupları fəaliyyət göstərəcək.
Eyni zamanda, məktəbəhazırlıq qrupları İsmayıllıda 38, Kürdəmirdə 41, Lerikdə 86, Lənkəranda 87, Masallıda 98, Mingəçevirdə 21, Naftalanda 3, Neftçalada 27, Oğuzda 24, Qaxda 18, Qazaxda 40, Qəbələdə 46, Qobustanda 16, Qubada 91, Qusarda 86, Saatlıda 40, Sabirabadda 70, Salyanda 48, Samuxda 34, Siyəzəndə 15, Sumqayıtda 40, Şabranda 23, Şamaxıda 34, Şəkidə 78, Şəmkirdə 62, Şirvanda 15, Tərtərdə 34, Tovuzda 51, Ucarda 35, Xaçmazda 87, Xızıda 8, Yardımlıda 29, Yevlaxda 41, Zaqatalada 48, Zərdabda 21 ümumtəhsil müəssisəsini əhatə edəcək.
Dövlət ümumtəhsil məktəblərində yaradılmış məktəbəhazırlıq qruplarına 5 yaşı həmin il tamam olmuş uşaqlar qəbul olunurlar.
Maraqlıdır, məktəbəhazırlıq qrupları bütün məktəblərdə niyə tətbiq olunmayıb?
Təhsil eksperti Əjdər Ağayev "Bakı-Xəbər"ə açıqlamasında qeyd etdi ki, hər hansı bir başlanğıc tədricən həyata keçirilir: "Bəllidir ki, məktəbə hazırlıq qrupları iki il öncə yaradılıb. Və o zamanlar az sayda tədris müəssisəsində tətbiq olunmuşdu. Ancaq indisə təqbiq olunan məktəblərin sayı artırılıb. Məlumat üçün bildirim ki, məktəbəhazırlıq qrupları o tədris ocağında yaradılır ki, orada uşaqlar üçün şərait var. Yəni otaq var, uşaqların rahatlığı üçün
hər bir şərait yaradılıb. Bunu hər bir məktəbdə tətbiq etmək mümkün deyil. Hansı məktəbdə otaq baxımıdan imkan varsa, orada qeyd edilən qruplar yaradılır. Məktəblər bina və texniki imkan baxımından təkmilləşdikcə, məktəbəhazırlıq qrupları digər tədris müəssisələrini də əhatə edəcək. Qeyd edim ki, ötən ildən fərqli olaraq, həm paytaxt, həm regionlarda məktəbəhazırlıq qrupları xeyli sayda orta məktəbdə tətbiq olunub".
Günel CƏLİLOVA
