Avqustun 2-nə keçən gecə saat 3.00 radələrində Sumqayıt şəhərinin "Qurd dərəsi" bağlar sahəsi ərazisində xidmət aparan Post Patrul Xidməti Bölüyünün iki əməkdaşı uzaqdan qəfil əyləc səsi eşidib. Həmin səmtə üz tutanda ərazidən keçərkən kanala düşən avtomobilin işıqlarını görüblər. Tez hadisə yerinə qaçaraq, xüsusi rabitə vasitəsilə dərhal bu barədə Sumqayıt Şəhər Polis İdarəsinin Növbətçi hissəsinə məlumat veriblər.
Polis serjantları Elşad Aslanov və Rəşad Məmmədov hadisə yerinə çatan kimi maşında olan iki nəfəri xilas etmək üçün tez kanala düşüb. Onlardan birini, çətinliklə də olsa, sudan dartaraq xilas edib kənara çıxarıblar. İkinci şəxsi xilas etməyə cəhd göstərsələr də, təəssüf ki, gecənin qaranlığında o, suyun iti axarı ilə gözdən itib.
Polis əməkdaşları xilas olunan şəxsə ilkin tibbi yardım göstəriblər.
Sumqayıt ŞPİ rəhbərliyinin göstərişilə bütün xidmət sahələrinin əməkdaşları, həmçinin Təcili Tibbi Yardım və Fövqəladə Hallar Nazirliyinin əməkdaşları hadisə yerinə gəlib.
Xilas olunan sərnişin - Sumqayıt şəhər sakini Elvin Məmmədov Təcili Tibbi Yardım əməkdaşlarına təhvil verilib.
Polis serjantları Elşad Aslanov və Rəşad Məmmədov FHN əməkdaşlarına digər şəxsin batdığı yeri göstərib və Xüsusi Risqli Xilasetmə Xidmətinin əməkdaşları tərəfindən meyit tapılaraq sudan çıxarılıb.
Polis əməkdaşlarının təşkilatçılığı ilə "Mercedes" markalı avtomobil kranla kanaldan çıxarılıb.
Xilaskar polislər - polis serjantları Elşad Aslanov və Rəşad Məmmədov hələ gəncdirlər. Onlar bir neçə ildir ki, daxili işlər orqanlarında xidmət edirlər.
Post Patrul Xidməti Taborunun bölük komandiri, polis mayoru Surxay Vəliyev bildirib ki, polis sıralarına gələn gənclərin vətənpərvərliyi, təəssübkeşliyi, hər zaman qarşıda duran vəzifələrin yerinə yetirilməsinə hazır olması onları sevindirir.
Polis hər zaman vətəndaşların yanındadır. Təhlükə anında da onlara hər zaman köməyə çatan birinci polislər olur.
Natiq CAVADOV DİN mətbuat xidmətinin əməkdaşı
