"Sosial İqtisadi və Ekoloji İnkişaf" İctimai Birliyi Azərbaycan Respublikası Mədəniyyət və Turizm Nazirliyinin dəstəyi ilə "Dağlıq Qarabağ münaqişəsi zamanı məhv olmuş maddi və mənəvi mədəniyyət nümunələri, tarix və mədəniyyət abidələri haqqında təbliğat işləri" adlı layihəsi çərçivəsində Qusar və Quba rayonlarında tədbir keçirib.
Keçirilən tədbirlərdə gənclər, Qarabağ müharibəsi iştirakçıları, rayon ictimaiyyətinin nümayəndələri iştirak edib. Tədbiri giriş sözü ilə açan Birliyin sədri Rahilə Mehtiyeva bildirib ki, layihənin məqsədi Dağlıq Qarabağ ərazisində olan və münaqişə zamanı məhv olmuş maddi və mədəniyyət nümunələri, tarix və mədəniyyət abidələri haqqında məlumatların gənclər arasında daha geniş təbliğ etməkdən ibarətdir. Azərbaycanın işğal edilmiş ərazilərində 13 dünya əhəmiyyətli - 6 memarlıq və 7 arxeoloji, 292 ölkə əhəmiyyətli - 119 memarlıq və 173 arxeoloji və 330 yerli əhəmiyyətli - 270 memarlıq, 22 arxeoloji, 23 bağ, park, monumental və xatirə abidələri, 15 dekorativ sənət nümunəsi tarix və mədəniyyət abidələri qalıb. Ermənistanın işğal altındakı Azərbaycan ərazilərində mədəni irsi məhv etməyə yönələn siyasətinin bir hissəsi də bu ərazilərdə qalan muzeylərdə saxlanılan misilsiz tarixi eksponatları, qiymətli incəsənət və mədəniyyət nümunələrini talan etməsidir. Mədəniyyət Nazirliyinin statistikasına görə, işğal olunmuş ərazilərdə 40 mindən çox eksponata malik olan 22 muzey qalıb. Bu muzeylərdən Azərbaycan xalqının tarixi və mədəniyyəti ilə bağlı qiymətli əşyalar, rəsm və heykəltəraşlıq əsərləri, dünya şöhrətli Azərbaycan xalçaları, xalça məmulatları, Azərbaycanın görkəmli şəxsiyyətlərinin xatirə əşyaları, digər qiymətli eksponatlar talan edilib. Qədim sikkələr, qızıl və gümüş məmulatlar, nadir və bahalı daşlar, xalçalar və digər əl işləri ilə zəngin olan Kəlbəcər rayonunun Tarix muzeyi, Şuşa rayonunun Tarix muzeyləri, Ağdam rayonunun dünyada nadir olan Çörək Muzeyi, Qubadlı tarix-diyarşünaslıq muzeyi (3 mindən çox əşya), Zəngilan rayonunun tarix-diyarşünaslıq muzeyi (6 minədək əşya), daş abidələr muzeyi çərçivəsində və bir çox başqa muzeylər bura daxildir. Bu muzeylərin, demək olar ki, heç birini xilas etmək, köçürmək mümkün olmayıb. Qeyd edilən tarixi əsərlər barədə birliyimiz böyüməkdə olan yeni nəslə daha geniş maarifləndirici məlumatlar çatdırılması üçün belə tədbirlər həyata keçirir." Tədbirdə, eyni zamanda, işğal altında olan mədəniyyət və tarixi abidələr haqqında çap olunmuş kitabçalar da paylanıb. Tədbirdə iştirak edən nümayəndələr çıxış edərək bildiriblər ki, ən böyük arzuları torpaqlarımızın qaytarılması, öz dədə-baba yurdundan didərgin düşən bütün qaçqın və məcburi köçkünlərin doğma ocaqlarına dönməsidir.
Sonda belə layihələrə dəstək verdiyi üçün Mədəniyyət və Turizm Nazirliyinə minnətdarlıqlarını bildirən birlik üzvləri layihə ilə bağlı yekun tədbir keçirərək, Azərbaycanın və mədəniyyət abidələrinin tarixi haqqında gələcəkdə də daha geniş təbliğat işləri aparılacağını qeyd edib.
Baki-xeber.com
