Fatimə Hacıbəyli: "Belə halların səbəblərindən birincisi odur ki, gənclər arasında rəsmi nikah quranların sayı azalıb"
Onları el arasında müxtəlif adlarla adlandırırlar. "Qanunsuz uşaqlar" deyən də var, lap irəli gedib "bic" damğası vuranlar da olur. Ancaq o uşaqlar nikahdankənar dünyaya gələn körpələr sayılır. Çünki qanun bu uşaqları belə qəbul edir. Açıqlanan statistik rəqəmlərə əsasən, nikahdankənar doğulan uşaqların sayı artıb.
Məlumatda bildirilir ki, ötən il 6 146 boşanma halı övladı olmayanların payına düşüb. Ötən il boşananlardan 3 399-nun bir, 3 569-nun isə iki və daha çox övladı olub. Boşanma nəticəsində valideynlərindən biri ilə qalan uşaqların sayı 11 295 olub. Hər 100 boşanmaya düşən uşaqların sayı 162 olub. Ötən il ümumilikdə 13 114 boşanma qeydə alınıb. Ötən il dünyaya gələn 26 288 uşaq rəsmi qeydə alınmayan nikahda olan qadınlar tərəfindən doğulub.
Ötən il 30 minə yaxın uşağın nikahdankənar dünyaya gəlməsi tək ekspertləri deyil, eyni zamanda ölkə ictimaiyyətini də narahat edir.
Ekspertlər bildirir ki, nikahdankənar uşaqların sayının artmasının müxtəlif səbəbləri var. Erkən nikah, evliliyin rəsmi qeydə alınmaması, azad seks yaşamaq istəyi və digər amillər bura aiddir.
Nikahdankənar doğulan uşaqların sayının artması barədə fikir bildirən "Vəfa" Sosial İctimai Birliyinin rəhbəri Fatimə Hacıbəyli "Bakı-Xəbər"ə açıqlamasında qeyd etdi ki, 30 minə yaxın uşağın kəbindənkənar dünyaya gəlməsi vəziyyətin pisə doğru dəyişməsindən xəbər verir: "Nikahdankənar uşaqların sayının çoxalmasının bir neçə səbəbi var. Belə halların səbəblərindən birincisi odur ki, gənclər arasında rəsmi nikah quranların sayı azalıb. Buna onların müxtəlif səbəbləri olur. İkinci bir məsələ odur ki, dindar ailələrdə bir kişi ilə iki və ya daha çox qadın ailə qurur və burada da, təbii ki, kişi xanımlardan yalnız biri ilə rəsmi nikaha girir. Digər qadından olan uşaqlar statistikaya qeyri-rəsmi nikahdan doğulan uşaqlar kimi düşürlər. Üçüncü bir məsələ qadınların tək yaşayıb karyera qurmaq arzusu ilə bağlıdır. Çünki onlar düşünürlər ki, həyat yoldaşı onlara mane ola bilər və bunun üçün də qeyri-rəsmi nikahdan övlad dünyaya gətirirlər".
Həmsöhbətimiz onu da əlavə etdi ki, Avropa ölkələrində vətəndaş nikahı, Azərbaycanda dini nikah nikahdankənar uşaq sayının artmasına səbəb olan amillərdən biridir: "Bəzən cəmiyyət arasında belə bir fikir formalaşır ki, qadınların sərbəst yaşamaq istəyi, onların azad seksə üstünlük verməsi vəziyyətin bu həddə çatmasına səbəb olur. Onu da unutmaq lazım deyil ki, Avropada vətəndaş nikahında yaşayan cütlük uşaq dünyaya gətirmək qərarına gəldikdə münasibətlərini rəsmiləşdirir. Yəni dünyaya gələcək uşağın mənafeyi nəzərə alınır. Azərbaycanda isə bunun əksinədir. Azərbaycanda azad seksual həyat yaşayıb, üstəlik bundan dünyaya uşaq gətirən qadınların sayı heç də iddia olunduğu qədər çox deyil. "Qanunsuz" adlandırılan uşaqlar, əslində, rəsmi nikahda olmayan qadınların dünyaya gətirdiyi uşaqlardır. Təsəvvür edin ki, bunların arasında hətta özü də ata-ana olan var, amma hələ də nikahdankənar uşaq hesab olunurlar. Çünki ata-ana illərlə bərabər yaşayıb, cəmiyyət onları ailə kimi qəbul edir, amma uşaqlar nikahdankənar doğulublar. Nikahdankənar doğulmaq o demək deyil ki, qadın kiminləsə əlaqədə oldu və uşaq dünyaya gətirdi. Təbii ki, belə hallar da var. Amma bu hallar Azərbaycanda çox deyil".
Günel CƏLİLOVA
