Şahin Camalov: "Onların fəaliyyəti olmadan yol hərəkətinin təhlükəsizliyini təmin etmək doğrudan da çətindir"
Xəbər verdiyimiz kimi, Bakıda yol polisi tərəfindən cərimə olunan xanım sürücü sosial şəbəkələrdə video yayaraq həmin polis əməkdaşını qadın sürücülərə qarşı nalayiq hərəkətlərdə ittiham edib və bildirib ki, yol polisi əməkdaşı 99 P 048 dövlət nömrə nişanlı motosikletdə xidmət aparan Fəriddir. Qadın iddiasına görə, o, xanım sürücüləri saxlayaraq onlara "padxod" edir, telefon nömrəsi istəyərək münasibət qurmağa çalışır. Buna nail olmadıqda isə cərimə yazır.
Amma Avtosfer.az-ın əməkdaşı hadisəni araşdırmaq üçün Bakı Şəhər Dövlət Yol Polisi İdarəsində olub. Hadisənin videogörüntüləri və səs yazıları ilə tanış olub. Araşdırmalar nəticəsində maraqlı faktlar ortaya çıxıb. Məlum olub ki, "Jeep Vrangler" markalı, 90 GG 044 dövlət nömrə nişanlı avtomobili idarə edən Fatma Talıbova avqustun 1-də, saat 15:40 radələrində Teymur Elçin və Lermontov küçələrinin kəsişməsində təhlükəsizlik kəmərindən istifadə etmədiyinə görə yol polisi əməkdaşı, çavuş Fərid Mustafazadə ona saxla işarəsi verib. Təhlükəsizlik kameralarının görüntülərindən də məlum olur ki, xanım sürücü saxla işarəsinə tabe olmayaraq hərəkətə davam edir. Sonra Mehdi Hüseyn küçəsində ("Alov qüllələri"nin yanı) digər avtomobillər yolu kəsdikdən sonra onu saxlamaq mümkün olur. Belə olan halda, qadın sürücü yol polisi əməkdaşına hədə-qorxu gəlir. Avtomobili saxlayan kimi özünü Daxili İşlər Nazirliyinin 102 xidmətinin əməkdaşı kimi təqdim edən xanım sürücü polisin saxla işarəsi zamanı əlini çiyninə qoyaraq "mən də paqonam" göstərir. Lakin saxlanan zaman, bunun əksinə olaraq, formada olmadığını bildirərək bundan imtina edir. Daha sonra xanım sürücü "sən bilmirsən mən kimin gəliniyəm, sənin paqonlarını sökdürəcəm" deyir. Polis əməkdaşı qadın sürücüyə protokol tərtib edir. Saxla işarəsinə tabe olmadığı üçün xanım sürücü 80 manat və 4 balla cəzalandırılıb.
İdarədən, həmçinin, bildirilib ki, F.Talıbova böhtan, yəni yalan olduğunu bilə-bilə YPX əməkdaşının şərəf və ləyaqətini ləkələyən, onu nüfuzdan salan məlumatları kütləvi informasiya vasitəsində yaydığına görə qanunvericiliyin tələblərinə uyğun qaydada məsuliyyətə cəlb olunması üçün iş məhkəməyə göndəriləcək.
Qadın sürücü F.Talıbovanın yol polisini şərləməsi yollarda təhlükəsizliyi qoruyan əməkdaşların gördüyü işə şər atmaq deməkdir.
Məsələ ilə bağlı fikir bildirən "Təhlükəsiz Yol Alyansı"nın koordinatoru Şahin Camalov "Bakı-Xəbər"ə açıqlamasında qeyd etdi ki, istənilən yol polisini şərləmək, onun haqqında həqiqət olmayan hansısa fikir səsləndirmək ümumən yol polislərinin fəaliyyətinə kölgə salmaq deməkdir: "Şəhərimizin küçələrini yol polisi qorumasa, düşünün vəziyyət hansı səviyyədə olar. İstər xanım sürücü olsun, istərsə də əks cinsin nümayəndələri, anlamırlar ki, yol polisləri ilk növbədə onların təhlükəsizliyini qoruyur. Yol polisi əməkdaşı xanım sürücünü kəmər taxmadığı üçün saxlamaq istəyib. Lakin həmin qadın başa düşməyib ki, əməkdaş onun təhlükəsizliyi üçün, kəmər taxmamasına görə saxlatdırmaq istəyib. Qadın öz bildiyini edib və saxla əmrinə tabe olmayaraq yoldan keçib. Təbii ki, o sürücü saxlanmalıdır. Təəssüf ki, həmin qadın özünü təmizə çıxarmaq üçün işlədiyi qurumun adını çəkir, daha sonra kimin gəlini olması ilə bağlı yol polisini təhdid etmək istəyir. Dediklərinin nəticəsinin olmayacağını görən xanım sürücü şantaj yoluna əl atır. Bu düzgün hərəkət deyil. Birincisi, ortada fakt var. Həmin dəlillər açıq-aşkar sübut edir ki, qadının iddia etdiyi problem olmayıb".
Həmsöhbətimiz onu da vurğuladı ki, yol hərəkətinin təhlükəsizliyini təmin edən yol patrul xidməti əməkdaşlarına qarşı bu cür hərəkətlərə rast gəlinir: "Sürücülər anlamalıdırlar ki, yollarda təhlükəsizliyi təmin edən yol polislərinin fəaliyyəti olmadan Bakı və rayonlarda hərəkət etmək mümkün deyil. Onların fəaliyyəti olmadan yol hərəkətinin təhlükəsizliyini təmin etmək doğrudan da çətindir. Çox təəssüf ki, sürücülərimiz yol hərəkəti ilə bağlı ciddi qüsurlara yol verirlər. Bu səbəbdən də hesab edirəm ki, yol polislərinin fəaliyyətinə kölgə salmaq düzgün deyil".
Günel CƏLİLOVA
