Bahadur Bilalov: "Xarici mediada həm "Azərbaycan Qran-Prisi", həm də görülən işlər barədə pozitiv məlumatların sayının artması bilet satışına öz təsirini göstərdi"
Bu il paytaxt Bakı iki möhtəşəm idman tədbirinə ev sahibliyi etdi - "Bakı-2017" İslam Həmrəyliyi Oyunları və "Formula 1 Azərbaycan Qran-Prisi". Bəllidir ki, "Formula 1 Azərbaycan Qran-Prisi" artıq iki ildir davamlı olaraq ölkəmizdə keçirilir. Qaydalara uyğun olaraq, qarşıdakı üç il ərzində də adıçəkilən həyəcanlı avtomobil yarışı keçiriləcək.
"Formula 1" idman yarışı dünyanın hər yerində böyük maraqla izlənir. Bu yarış hansı ölkədə keçirilirsə, həvəskarlar düşünmədən həmin ölkəyə onu izləmək üçün yollanırlar.
Bu il Bakıya qeyd etdiyimiz yarışı izləmək üçün çoxlu sayda turist gəldi. Açıqlanan statistik rəqəmlərə əsasən, "Formula 1 Azərbaycan Qran-Prisi"ndə satışa çıxarılan 30 min biletin hamısı satılıb. Bakı Şəhər Halqasının Marketinq və kommunikasiya şöbəsinin rəhbəri Nigar Arpadarai media nümayəndələrinə açıqlamasında deyib ki, bu dəfə xarici vətəndaşlar tərəfindən alınan biletlərin sayı ötən illə müqayisədə iki dəfə çox idi.
Onun sözlərinə görə, tribunalar 97 faiz dolub: "16 sektordan 6-sı tam dolu idi, qalanları isə 97 faiz dolu idi".
N.Arpadarai əlavə edib ki, ümumilikdə həm yarışlarda, həm də konsert proqramlarında 71 mindən artıq tamaşaçı iştirak edib. Bu da keçən illə müqayisədə 30 faizdən çoxdur. Şöbə rəhbəri vurğulayıb ki, yarışlardan gözləntilər özünü doğruldub: "Həm yarışın təşkilatçılığı, həm tamaşaçıların iştirakı, həm də xarici qonaqların gəlişi ilə bağlı gözləntilərimiz özünü doğrultdu, xarici vətəndaşlar yarışa böyük maraq göstərdi".
Turizm sahəsi üzrə ekspert Bahadur Bilalov bizimlə söhbətində bildirdi ki, "Formula 1" yarışının izləyiciləri, ötən il olduğu kimi, bu il də Bakıya toplaşmışdı: "İzləyicilərin ötən illə müqayisədə iki dəfə artıq olması gözlənilən idi. Çünki ötən il yarışı izləyə bilməyənlər bu il bu fürsəti qaçırmaq istəmədilər.
Ümumilikdə isə, bu il insanlar yarışa daha həssas və müsbət yanaşdılar. Ötən il yarışdan əvvəl işlərə başlayanda insanlar düşünürdülər ki, bizə "Formula 1" lazımdırmı? Yarışlar necə keçəcək? Ümumiyyətlə, bu nədir? Deyirdilər ki, yollar bağlanır, narahatlıq olur. Qənbər daşlı yolların asfaltlanmasına etiraz edirdilər. İndi isə biz tam fərqli atmosfer, tam başqa yanaşmanın şahidi olduq. Bu il isə insanların tək istəyi yarışı izləmək idi. Həmçinin, xarici mediada həm "Azərbaycan Qran-Prisi", həm də görülən işlər barədə pozitiv məlumatların sayının artması bilet satışına öz təsirini göstərdi". Günel CƏLİLOVA
