Azər Həsrət: "Televiziya və ya radio kanallarında təsadüfi şəxslərin şou-proqramlar təqdim etməsi biabırçılıqdır"
Televiziya və radiolarda ədəbi dil normalarının pozulması ilə bağlı dəfələrlə mübarizə aparılıb. Aidiyyəti qurumların səyi nəticəsində müəyyən dövrlərdə televiziya və ya radioda ədəbi dil normaları bərpa olunub. Ancaq son zamanlar məlum problem yenidən baş qaldırıb.
Belə ki, Milli Televiziya və Radio Şurasının (MTRŞ) Ekspertiza, Proqramlaşdırma və Analitik Şöbəsinin müdiri Təvəkkül Dadaşov media nümayəndələrinə açıqlamasında deyib ki, ümummilli lider Heydər Əliyevin imzaladığı 9 avqust 2001-ci il tarixli Fərmanla hər il avqust ayının 1-i ölkəmizdə Azərbaycan əlifbası və Azərbaycan dili günü kimi qeyd edilir. Bu gün istər çap mediası, istərsə də elektron media Azərbaycan dilinin inkişafına mühüm təsir göstərməkdədir. Xüsusilə müasir dövrdə TV və radiolar ədəbi dilin cilalanmasında vacib rol oynayır. Lakin çox təəssüf ki, bir sıra hallarda TV və radiolarda Azərbaycan dilinin normaları, qayda və qanunlarının pozulması, xarici dillərin təsiri altına düşmə hallarına rast gəlinməkdədir.
T.Dadaşov onu da vurğulayıb ki, MTRŞ yerli televiziya və radioların məsul şəxslərini, aparıcıları Azərbaycan dilinin saflığının qorunub saxlanmasına, onun normalarına riayət olunmasına həssas yanaşmağa çağırır.
Media sahəsi üzrə ekspert Azər Həsrət "Bakı-Xəbər"ə açıqlamasında qeyd etdi ki, televiziya və radio aparıcılarının danışıq dili onu da incidən mövzulardan biridir: "Televiziya və ya radio kanallarında təsadüfi şəxslərin şou-proqramlar təqdim etməsi biabırçılıqdır. Ən çox radioya qulaq asdığımız üçün, bu sahədə vəziyyətin heç də ürəkaçan olmadığını eşidirik. Radio aparıcıları açıq şəkildə insanları əsəbləşdirəcək tonda və danışıq dilində veriliş aparırlar. Azərbaycan dilinə qarşı hörmətsizlik açıq şəkildə nümayiş etdirilir. Bu məsələ bizi də narahat edir.
Məlum problemlə bağlı MTRŞ dəfələrlə xəbərdarlıq edib, müəyyən işlər görsə də, nəticə yenə də ciddi şəkildə dəyişmir. Televiziya və ya radio aparıcılarının dilində qeydə alınan qüsurlar birbaşa həmin qurumlara başçılıq edən şəxslərlə bağlıdır. Onların arasında elələri var ki, hətta Azərbaycan dilinin normalarını, qaydalarını bilmirlər".
A.Həsrət problemin həlli yolu kimi təklif edir ki, bütün radio və televiziya kanallarının nəzdində Dil Şurası yaradılsın.
Günel CƏLİLOVA
