Bahadur Bilalov: "Bölgələrin təmiz havası, ecazkar təbiəti turistlərin diqqətini cəlb edir"
Azərbaycan turizm ölkəsinə çevrilməkdədir. Bunu ölkəmizə gələn turist axını da sübut edir. Şəhərin küçələrində, ticarət mərkəzlərində və ya bölgələrimizdə çoxlu sayda turist görmək mümkündür.
Paytaxt Bakı ilə yanaşı, bölgələrimizə də səfər edən turistlərin sayı artır. Turistlər tək Bakıya deyil, eyni zamanda səfalı bölgələrimizə də maraq göstərir.
Mədəniyyət və turizm naziri Əbülfəs Qarayev vətəndaşların qəbulundan sonra Şəki şəhərindəki bir sıra mədəniyyət müəssisələrinə baş çəkərkən bildirib ki, turistlərin bölgələrə səfəri artıb.
Nazirin sözlərinə görə, Şəki ölkəmizdə turistlərin ən çox üz tutduğu məkanlardan biridir. Bu baxımdan qədim şəhərin tarixi məkanlarının gələn qonaqlara yüksək səviyyədə təqdimatı və turistlərə göstərilən mədəni xidmətlərin səviyyəsi daha da artırılmalıdır.
Paytaxt Bakı ilə yanaşı, turistlərin bölgələrimizə səfəri ilə bağlı fikir bildirən turizm sahəsi üzrə ekspert Bahadur Bilalov bizimlə söhbətində bu halın gözlənilən olduğunu vurğuladı: "Azərbaycanın istənilən səfalı bölgəsinə turistlər səfər edir. Göy göl, Qəbələ, Lənkəran, İsmayıllı, Şəki və digər rayonlarımıza turistlər maraq göstərir. Əslində, bu yaxşı haldır. Turistlər tək Bakıya toplaşmamalıdır. Onlar bizim bölgələrimizi də tanımalıdır. Təbii ki, Bakı ilə səfalı rayonların havası, mühiti bir deyil. Bakıda insanlar sıx toplaşıb, əhalinin sayı çoxdur, binaların sayı və digər amillər şəhərin havasına təsir göstərir. Ancaq bölgələrin təmiz havası, ecazkar təbiəti turistlərin diqqətini cəlb edir. Turistlər Hacıkəndə daha çox meyl edir. Ora digər bölgələrlə müqayisədə daha sərin olduğu üçün, turistlərin diqqətini daha çox çəkir".
Həmsöhbətimiz onu da bildirdi ki, rayonlarda olan tarixi abidələr bölgə turizminin inkişafına təsir göstərir: "Bəllidir ki, rayonlarımızda tarixi abidələr, məkanlar daha çoxdur. İstər avropalıların, istərsə də ərəblərin diqqətini tarixi abidələr daha çox çəkir".
Günel CƏLİLOVA
