Hacıəmi Atakişiyev: "Belə bir fərmanın verilməsində əsas məqsəd reklam sahəsində yaşanan korrupsiyanın qarşısının alınmasıdır"
Reklam yerləşdirilməsi ilə bağlı artıq yeni prosedurlar qüvvəyə minəcək. Azərbaycan Prezidenti İlham Əliyev "Dövlət rüsumu haqqında" Azərbaycan Respublikasının Qanununda dəyişikliklər edilməsi barədə" Azərbaycan Respublikasının 2017-ci il 30 iyun tarixli Qanununun tətbiqi ilə bağlı 31 iyul tarixli Fərman verib.
Qüvvəyə minən "Dövlət rüsumu haqqında" Qanuna dəyişikliklərə əsasən "küçə reklamı" anlayışı "açıq məkanda reklam" anlayışı ilə əvəzlənir və açıq məkanda reklam yerləşdirilməsinə icazə verilməsi üçün tutulan dövlət rüsumunun yeni dərəcəsi müəyyənləşir. Bundan sonra açıq məkanda reklam yerləşdirilməsinə icazə verilməsi üçün 5 manatdan 100 manatadək dövlət rüsumu tələb olunacaq. Açıq məkanda reklam yerləşdirilməsinə icazə verilməsinə görə müvafiq icra hakimiyyəti orqanının (icazənin müddəti, reklam daşıyıcısının növü və quraşdırıldığı zonası nəzərə alınmaqla) bir kvadratmetr üçün müəyyən etdiyi dövlət rüsumu ödəniləcək. Açıq məkanda sosial reklamın yerləşdirilməsinə icazə verilməsinə görə dövlət rüsumu ödənilməyəcək.
Qeyd edək ki, bu il iyunun 20-də Azərbaycan Prezidenti İlham Əliyev "Dövlət Reklam Agentliyinin yaradılması haqqında" Fərman imzalayıb və açıq məkanda reklam yerləşdirilməsinə icazə verilməsi ilə bağlı qanunda nəzərdə tutulan müvafiq icra hakimiyyəti orqanının səlahiyyətlərini Dövlət Reklam Agentliyi həyata keçirəcək. Reklam Agentliyi avtomobil yollarının torpaq sahəsində, şəhər, qəsəbə, kənd və digər ("İçərişəhər" Dövlət Tarix-Memarlıq və "Qala" Dövlət Tarix-Etnoqrafiya qoruqlarının ərazisi istisna olmaqla) yaşayış məntəqələrində (açıq məkanda) reklam daşıyıcılarının yerləşdirilməsi, reklam daşıyıcılarında yerləşdirilən reklamların istehsalı (hazırlanması) və yayımlanması sahəsində vahid tənzimləməni və nəzarəti həyata keçirən publik hüquqi şəxsdir.
Azərbaycan Reklamçılar İttifaqı İctimai Birliyinimn sədri Hacıəmi Atakişiyev "Bakı-Xəbər"ə açıqlamasında qeyd etdi ki, açıq havada yerləşdirilən reklam tablolarına görə rüsumun ödənilməsi gözəl ideyadır: "Ümumiyyətlə, bu qanundan sonra küçə reklamının qarşısı alınacaq. Kim harada, necə istəyirsə, istədiyi məhsulu və ya obyekti reklam edə bilməyəcək".
Həmsöhbətimizin sözlərinə görə, məlum fərmana əsasən, icra orqanlarının nəzdində olan reklam şöbələri bağlanacaq. Və bununla da bu sahədə yaşanan korrupsiya hallarına son qoyulacaq: "Belə bir fərmanın verilməsində əsas məqsəd reklam sahəsində yaşanan korrupsiyanın qarşısının alınmasıdır. Bunun ləğvi ilə bu sahədə şəffaflıq nəzərə çarpacaq".
H.Atakişiyevin sözlərinə görə, açıq hava şəraitində reklama görə rüsumun müəyyən olunması bu sahədə bir nizam yaradacaq.
Günel CƏLİLOVA
