Eyyub Hüseynov: "Hazırda satışda olan bəzi sosiskaları aylarla günün altında saxlayanda xarab olmur, bu onun sübutudur ki, tərkibi kimyəvi maddədir"
İstehlak bazarında keyfiyyətsiz malların satışının qarşısının alınması məqsədilə İqtisadiyyat Nazirliyi tərəfindən aparılan tədbirlər davam edir. Nazirliyin araşdırması nəticəsində bu səfər müxtəlif ticarət obyektlərində satışda olan malların ilkin laborator müayinəsi zamanı "Hicaz 313" MMC tərəfindən istehsal olunan ət məhsullarının tərkibində insanların həyat və sağlamlığı üçün təhlükə yaradan mikroorqanizmlərin normativ sənədlərlə yol verilən miqdardan artıq olduğu müəyyən edilib.
Bəllidir ki, bu gün satışda müxtəlif adda sosiskalar istehsal olunur. Onların tərkibinin necə olması, ümumiyyətlə standartlara cavab verib-verməməsi sual doğurur.
Maraqlıdır, sosiskaların tərkibi necə olmalıdır?
Azad İstehlakçılar Birliyinin (AİB) sədri Eyyub Hüseynov bildirdi ki, bazarın sosiska seqmentində mürəkkəblik yaşanır: "Belə ki, bazarda sağlam niyyətə xidmət edən, sağlam mal ətindən sosiska hazırlayan, qanunlar çərçivəsində, standartlara uyğun məhsul hazırlayan şirkətlər var. Yəqin ki, bu vəziyyəti yaxşılaşdırmaq, bazardakı mövcud əngəlləri aradan qaldırmaq üçün iş aparacağıq. Bu sahədə olan problemlərə gəldikdə isə, təhlükəsiz mal istehsal edən vicdanlı biznesmenlərin bazarına daxil olub, qiyməti aşağı salıb istehlakçıları aldadan şirkətlər az deyil".
AİB sədrinin fikrincə, uzun müddətdir ölkənin müxtəlif yerlərindən xəstəlikdən ölən heyvanları kəsib Bakıya gətirənlər də az deyil: "Onlar əsasən sosiska sexlərinə gedir. Biz bilirik ki, murdar olmuş, çölə atılmış, xəstəlikdən ölmüş heyvanları kimlər gətirir və hara gətirir, hansı sexlərə verirlər. Lakin mən bir neçə müvafiq quruma zəng etmişəm ki, KİV-in iştirakı ilə gedib onları ifşa edək. Lakin bildirirlər ki, əməliyyat hazırlayaq, yaxud KİV-ə deyilməsin. Həmin "istehsal prosesi" isə gecə saat 12:00-dan 5-ə qədər davam edir. Bütün bunların nəticəsidir ki, bazarda ətdən ucuz sosiskalar var. Mənim yanıma sosiska gətirmişdilər, onu kibritlə yandırdıqda qara tüstü içində yandı və bilinmir ki, tərkibi nədir".
E.Hüseynovun sözlərinə görə, hazırda satışda olan bəzi sosiskaları aylarla günün altında saxlayanda da xarab olmur: "Bu onun sübutudur ki, tərkibi kimyəvi maddədir. Çünki ət bir sutkadan artıq qaldıqda iylənməlidir. Eləcə də həmin sosiskaların üzərində tərkibi ilə bağlı məlumat göstərilmir. Halbuki, yeyinti məhsulları haqqında qanunvericiliyə görə, onun üzərində kimyəvi maddələri də göstərilməlidir".
Günel CƏLİLOVA
