Polşa vətəndaşı Sebastian Gmerek öz "facebook" səhifəsində polislərimizlə çəkdirdiyi şəklini paylaşaraq minnətdarlığını ifadə edib.
Polşa Respublikasının Poznan şəhər sakini Sebastian Gmerek iyulun 23-də ölkəmizə turist kimi səfərə gəlib. Azərbaycanın gözəlliyi, füsunkar təbiəti onu valeh edib. 25 yaşlı turist İsmayıllı rayonunun Həftəsiab kəndində olarkən qoyun sürüsünü görüb və onları yaxından müşahidə etmək istəyib. Lakin yaxınlaşan zaman sürünü qoruyan çoban itləri ona hücum edərək yüngül xəsarət yetiriblər.
Xoşbəxtlikdən, həmin vaxt ərazidə xidmət aparan İsmayıllı RPŞ-nin polis sahə rəisləri - polis leytenantları Mahir Nurəliyev və Nicat Osmanov səs-küyü eşidib, tez özlərini köməyə yetiriblər. Polis əməkdaşları polşalı turisti itlərin hücumundan xilas edib, dərhal ilkin tibbi yardım göstərib, müayinə olunması üçün İsmayıllı rayon Mərkəzi Xəstəxanasına çatdırıblar.
Hazırda Sebastian Gmerekin vəziyyəti yaxşıdır, rayon Mərkəzi Xəstəxanasında stasionar müalicədədir, həkimlərin dediyinə görə səhhəti üçün heç bir təhlükə yoxdur.
Polşa vətəndaşı bildirib ki, azərbaycanlıların qonaqpərvərliyi, həmçinin Azərbaycan polisinin şücaəti və operativliyi onu valeh edib.
Xəyalə MƏMMƏDOVA DİN mətbuat xidmətinin əməkdaşı
