Kamran Əsədov: "Təəssüf ki, 2014-2015-ci illərə qədər bir çox məktəb direktorları, rayon təhsil şöbələri artıq dərs saatlarını vakansiyaya çıxarmadılar"
Məlum olduğu kimi, ümumtəhsil müəssisələrində çalışmaq istəyənlər mərkəzləşdirilmiş qaydada keçirilən müəllimlərin işə qəbulu üzrə müsabiqədə iştirak etməlidir. İlkin mərhələ sayılan testdən keçən gənc pedaqoqlar daha sonra müsahibədə iştirak etməli olur. Hər iki sınaqdan uğurla çıxanlar vakant yer müəyyən olunmuş məktəblərdə çalışa bilər.
Ancaq bu günlərdə belə bir məlumat yayıldı ki, bu il ümumtəhsil müəssisələrinə mərkəzləşdirilmiş qaydada keçirilən müəllimlərin işə qəbulu üzrə müsabiqəyə Abşeron rayonundan vakansiyalar təqdim olunmayıb.
Məsələyə münasibət bildirən Təhsil Nazirliyinin İctimaiyyətlə əlaqələr sektorunun nümayəndəsi mediaya açıqlamasında qeyd edib ki, müəllimlərin işə qəbulu ilə bağlı müsabiqəyə, Abşeron rayonu istisna olmaqla, ölkənin bütün bölgələrindən vakansiyalar təqdim edilib.
Qeyd olunub ki, Abşeron rayonu üzrə vakant yerlərin müsabiqəyə çıxarılmamasının əsas səbəbi 2013-2017-ci illərdə bu bölgədən xeyli sayda müəllimin müsabiqədənkənar işə qəbul olunmasıdır: "Təhsil Nazirliyi müvafiq prosedurlara uyğun müəllim olmaq istəyən şəxslərin hüquqlarını pozan bu halı araşdırmaq üçün aidiyyəti qurumların təmsil olunduğu işçi qrupun yaradılmasını təklif edib. İşçi qrup vakansiyaların təqdim olunmasında ortaya çıxan pozuntuların, eləcə də müəllimlərin işə qəbulunun obyektiv araşdırılması istiqamətində iş aparacaq. Kütləvi pozuntu halları tam araşdırıldıqdan sonra işçi qrupunun verdiyi təkliflər əsasında Abşeron rayonu üzrə müəllimlərin işə qəbulu prosesi həyata keçiriləcək".
Belə bir məlumat yayılır ki, müəllimlərin müsabiqədənkənar işə qəbulu bəzi bölgələrdə də qeydə alınır.
Məsələ ilə bağlı fikir bildirən təhsil sahəsi üzrə ekspert Kamran Əsədov "Bakı-Xəbər"ə açıqlamasında qeyd etdi ki, Bakı şəhərində müəllimlərin işə qəbulu 2009-cu ildən etibarən müsabiqə yolu ilə həyata keçirilir. Bu proses 2011-ci ildən isə bütün ölkəni əhatə etməyə başlayıb: "Yəni Azərbaycanda fəaliyyət göstərən 4447 orta ümumtəhsil məktəbində çalışmaq istəyən müəllimlər işə qəbul üçün mərkəzləşmiş qaydada imtahan verməlidir. Təəssüf ki, 2014-2015-ci illərə qədər bir çox məktəb direktorları, rayon təhsil şöbələri artıq dərs saatlarını vakansiyaya çıxarmadılar. Onu saat hesabı və ya əvəzləyici qaydada müəllimləri prosesə cəlb etməklə vəziyyəti ört-basdır etdilər. Lakin yeni təhsil naziri tərəfindən bütün ölkə ərazisində müəllimlərin diaqnostik qiymətləndirilməsi aparıldı. Diaqnostik qiymətləndirmə ümumi əsaslarla mərkəzləşmiş qaydada işə qəbul olunmuş müəllimlər üçün həyata keçirilməli idi. Məlum oldu ki, 20 000-ə yaxın müəllim məktəb direktorlarının vəzifə səlahiyyətlərindən sui-istifadə etməsi yolu ilə, müsabiqədənkənar işə qəbul olunub. Daha sonra imtahandankənar müəllimlərin yerləri vakansiyaya çıxarıldı".
Ekspertin sözlərinə görə, hər hansı bir yerdə müəllim çatışmazlığı olacaqsa, bu barədə məlumat artıq nazirliyin aidiyyəti şöbəsində qeydə alınacaq: "Bu zaman müəllimlərin həmin məktəblərdə yerləşdirilməsi daha asan, real olacaq. Bu, müəllimin istədiyi məktəbə düşmək şansını daha çox artıracaq".
Günel CƏLİLOVA
