Şəmsəddin Əliyev: "Ona görə də bu işlə məşğul olanları cəzalandırmaqla yanaşı, vətəndaşlara dəymiş ziyan da ödənilməlidir"
Azərbaycan Respublikasında həyata keçirilən davamlı sosial-iqtisadi inkişaf strategiyasına uyğun olaraq, vətəndaşların sosial müdafiəsinin gücləndirilməsi istiqamətində aparılan mütərəqqi islahatların tərkib hissəsi kimi, son illər əhalinin mənzilə olan ehtiyacının ödənilməsi, məişət şəraitinin yaxşılaşdırılması istiqamətində mühüm tədbirlər görülməkdədir.
Lakin buna baxmayaraq, öz şəxsi mənafelərini güdmək məqsədilə dövlətin iqtisadi-maliyyə münasibətlərinə, əhalinin sosial müdafiəsinin həyata keçirilməsi sahəsində siyasətinin nüfuzuna xələl gətirən, vətəndaşların mülkiyyət hüquqlarının kobud şəkildə pozulması ilə nəticələnən qanunsuz hərəkətlər törədən bəzi iş adamlarının qanun qarşısında ifşası və məsuliyyətə cəlb edilməsi istiqamətində Baş Prokuror yanında Korrupsiyaya Qarşı Mübarizə Baş İdarəsi tərəfindən ardıcıl və təxirəsalınmaz tədbirlər davam etdirilir.
Belə ki, "579 SSA" MMC özəl müəssisəsinin vəzifəli şəxslərinin MİDA-nın adından qanunsuz istifadə edərək dələduz hərəkətləri ilə bağlı araşdırma aparılıb. Məlum olub ki, MMC-nin təsisçisi Salayev Eldar Ağaşirin oğlu və şirkətin direktoru vəzifəsində işləyən Qafarov Məhəmməd Elman oğlu, qabaqcadan əlbir olaraq, öz qulluq mövqelərindən istifadə etməklə, MİDA tərəfindən tikilən binalarda mənzil satışını həyata keçirmək səlahiyyətləri olmadığına baxmayaraq, bir neçə nəfəri aldadaraq sosial mənzil alınmasında köməklik göstərəcəklərini yalandan vəd ediblər. Güzəştli şərtlərlə sosial mənzillərin satılması adı altında digər 25 nəfər vətəndaşın da əmlaklarının ələ keçirilməsi faktları müəyyən olunub. Baş verənlərlə bağlı istintaq gedir.
Göründüyü kimi, bu dələduzluq ölkə Prezidentinin də diqqət mərkəzində olan mühüm bir sosial layihəyə qarşı təxribatdır. Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, belə mühüm layihəyə qarşı dələduzluq edənlər sərt cəzalandırılmalıdır: "Belə halların baş verməsi yolverilməzdir. Bir sıra ölkələrdə sosial məsələlərin həlli ön sıradadır. Çünki sosial problemlər olan yerdə bu, cəmiyyətdə müəyyən çətinliklər yaradır. Azərbaycanda dövlət başçısının bu istiqamətdə uğurlu siyasət həyata keçirməsi təqdir olunmalıdır. O cümlədən, sosial mənzil tikintisi ilə bağlı görülən işlər alqışa layiqdir. Ancaq çox təəssüf ki, bundan sui-istifadə edənlər də var. Bu minvalla belə vacib layihəyə kölgə salmaq istəyirlər. Vətəndaşların etibarından sui-istifadə edib onlara ziyan vururlar. Bu, dələduzluğun ən çılpaq növlərindən biridir. Dələduzluq korrupsiya cinayətlərindən olduğundan, Baş Prokuror yanında Korrupsiyaya Qarşı Mübarizə Baş İdarəsi bu istiqamətdə istintaqın obyektiv aparılmasını təmin edir. Təəssüfləndirici hal həm də ondan ibarətdir ki, bu cinayət bir qrup şəxs tərəfindən törədilib. Yəni burada mütəşəkkil bir dəstə var. Mütəşəkkil dəstə tərəfindən törədilən bu cinayətlər, təbii ki, ictimai münasibətlərə çox ciddi ziyan vurur. Ona görə də belə hallar bağışlanmazdır. Bu, dövlətin apardığı uğurlu sosial siyasətə qarşı bir təxribatdır. Ona görə də bu işlə məşğul olanları cəzalandırmaqla yanaşı, vətəndaşlara dəymiş ziyan da ödənilməlidir. O zaman sosial ədalət öz həllini tapmış olacaq. Yəni cəzanın məqsədi çılpaqlığı ilə üzə çıxmış olar. Hesab edirəm ki, bununla bağlı qanunvericilik bazasını daha da təkmilləşdirmək lazımdır".
Vidadi ORDAHALLI
