Kəmalə Ağazadə: "Övlad sahibi ola bilməyən valideynlər artıq övladlığa uşaq götürmək deyil, süni mayalanma yolu ilə uşaq həsrətinə son qoyur"
Məlumatlara əsasən, son 10 il ərzində Azərbaycanda övladlığa götürülən uşaqların sayı azalıb. Statistikaya əsasən, 2006-cı ildə Azərbaycanda 929, 2007-ci ildə 972 uşaq övladlığa götürüldüyü halda, 2014-cü ildə belə uşaqların sayı 918-ə, 2015-ci ildə 805-ə, 2016-cı ildə isə 773-yə enib.
Övladlığa götürülən uşaqlar arasında oğlanlar üstünlük təşkil edir.
2012-ci ildə övladlığa götürülən uşaqların 482-si qız, 507-si oğlan, 2013-cü ildə 432-si qız, 529-u oğlan, 2014-cü ildə 408-i qız, 510-u oğlan, 2015-ci ildə 375-i qız, 430-u oğlan, 2016-cı ildə isə 371-i qız, 402-si oğlan olub.
Ümumilikdə, övladlığa götürülən uşaqlar arasında 1-5 yaşlılar üstünlük təşkil edir.
Ötən il övladlığa verilən uşaqların 344 nəfəri 1-5 yaşlı uşaqlar olub. Həmin uşaqların 161-i qızdır.
Maraqlıdır, övladlığa götürülən uşaqların sayı nə səbəbdən azalır?
Məsələ ilə bağlı uşaq sahəsi üzrə ekspert Kəmalə Ağazadəyə müraciət etdik. O, "Bakı-Xəbər"ə açıqlamasında qeyd etdi ki, övladlığa götürülən uşaqların sayı həqiqətən azalıb. Azalmanın isə bir neçə səbəbi var: "İlk olaraq deyim ki, son vaxtlar səhiyyə ailə planlaşdırılması istiqamətində süni mayalanmaya çox üstünlük verilir. Övlad sahibi ola bilməyən valideynlər artıq övladlığa uşaq götürmək deyil, süni mayalanmaya yolu ilə uşaq həsrətinə son qoyur.
Həmçinin, uşaqların övladlığa götürülməsi prosedurunun süni şəkildə şişirdilməsi bu sahəyə öz təsirini göstərir. Qeyd olunur ki, guya övladlığa uşaq götürmək olduqca çətindir və çarəsiz qalan valideynlər süni mayalanmanı çıxış yolu seçir. Eləcə də yeni doğulmuş uşaqların övladlığa götürülməsi qaydalarının sərt olması barədə fikirlər səslənir. Böyük yaşlı uşaqları isə valideynlər övladlığa götürmək istəmir. Bu səbəbdən də övladlığa uşaq götürmək istiqamətində azalma qeydə alınır".
Günel CƏLİLOVA
