Fatimə Hacıbəyli: "Paytaxtın mərkəzi küçələrində yüngül həyat tərzi keçirən qadınların ərəblərlə iyrənc bazarlığının şahidi oluruq"
Bu il Azərbaycana gələn turistlərin sayı ötən illərlə müqayisədə xeyli artıb. Bakının mərkəzi küçələrində ərəb, iranlı turistə, eləcə də digər millətlərin nümayəndələrinə rast gəlmək olar. Ərəb turistlərin sayı isə digərləri ilə müqayisədə çoxluq təşkil edir.
Əslində, ərəb və ya başqa bir millətin nümayəndələrinin ölkəmizə maraq göstərməsi sevindiricidir. Çünki söhbət turizmin inkişafından gedir. İnkişaf olan yerdə, təbii ki, turizm sahəsi də seçiləcək.
Ancaq təəssüf hissilə qeyd etmək lazımdır ki, ərəb turistlərinin Bakıya gəlməsi bəzi yüngül həyat tərzi keçirən qadınların lap ürəyincə olub.
Bəllidir ki, Bakı bulvarından sonra turistlərin ən çox üz tutduğu yer "Torqovı" kimi tanıdığımız Nizami küçəsidir. Bu ünvan, demək olar ki, yüngül həyat tərzi keçirən qadınların bazarına çevrilib. Axşam saatlarında qeyd etdiyimiz ünvanda o qadınların ərəblərlə necə bazarlıq etməsini istənilən kəs müşahidə edə bilər. Acınacaqlısı odur ki, bu işlə məşğul olan qadınlar ərəbləri cəlb etmək üçün çox diqqətçəkən geyimdə olur. Bu xoşagəlməz vəziyyəti həmin ərazidən keçən uşaq, məktəbli, yaşlı və ya istənilən şəxs açıq şəkildə görə bilər. İnsanların sıx toplaşdığı məkanda belə bir vəziyyətin yaranması insanların haqlı narazılığına səbəb olur. Hətta bu məsələ dəfələrlə sosial şəbəkələrdə də müzakirə edilib. Sosial şəbəkə istifadəçiləri bu haldan narahatlıqlarını və bəzi qadınların açıq şəkildə ərəblərlə qiymət söhbəti aparmasının qeyri-etik olduğunu qeyd ediblər. Hətta təkliflər səslənir ki, bu işlə məşğul olanlar üçün, xarici ölkələrdə olduğu kimi, xüsusi məkanlar olsun. Yəni onların əxlaqdan kənar hərəkətlərini cəmiyyət, xüsusən də azyaşlılar və yeniyetmələr görməsin.
Acınacaqlı vəziyyətin şahidi olanlardan biri də "Vəfa" Sosial-İctimai Birliyinin rəhbəri Fatimə Hacıbəylidir. O bizimlə söhbətində bildirdi ki, axşam saatlarında bulvar və "Torqovı" deyilən ərazi artıq insanların istirahət məkanı deyil: "Çünki bu ərazilərdən keçərkən yüngül həyat tərzi keçirən qadınların ərəblərlə iyrənc bazarlığının şahidi oluruq. Eşitdiyimə görə, bu işdə vasitəçilər də var. Yəni tərcüməçi. Tərcüməçi hər iki tərəfə nə demək istədiklərini başa salır.
İlk öncə sosial şəbəkə vasitəsilə istifadəçilərin bu barədə narazılığını oxudum. Öncə oxuduqlarıma inanmadım, sonra özüm "Torqovı"da olarkən yazılanların doğru olduğunu müşahidə etdim. Demək olar ki, bəzi qızlarımız ərəblərə yaxınlaşıb özlərini təklif edir. Küçədə bir-birinin dilini bilməsələr də, əl-qolla qiymət davası gedir. Çox biabırçı vəziyyətdir. Bu mənzərini görmək inanın insana çox pis təsir edir".
Günel CƏLİLOVA
