"Ayıq sürücü və taksi xidməti" - "Avtomobili rahat şəkildə idarə edənlər və şəhəri tanıyan sürücülər işə qəbul olunur" "Ayıq sürücü xidməti", Əkbər: "Müştərilərlə davranış qaydalarını nəzərə alaraq, səbrli və təmkinli sürücülərə daha çox üstünlük veririk"
Son zamanlar bu xidmət Azərbaycanda, xüsusən də Bakı şəhərində yetərincə populyardır. Söhbət "Ayıq sürücü xidməti"ndən gedir. Sərxoş, səhhətində yaranan problemlə bağlı avtomobilini idarə edə bilməyənlər üçün "Ayıq sürücü xidməti" mövcuddur. Bu xidmət Avropa ölkələrində uzun illərdir fəaliyyət göstərir. Azərbaycanda isə bir neçə ildir belə bir fəaliyyət növü sürücülərə xidmət göstərir.
"Ayıq sürücü xidməti"nin fəaliyyəti barədə məlumat toplamaq üçün bu şirkətlərin bəzisinə müraciət etdik.
"Ayıq sürücü və taksi xidmətinin" nümayəndəsi bizimlə söhbətində bildirdi ki, sürücülər işə götürülərkən əsas onların maşını necə idarə etməsi öyrənilir: "İdarə edəcəkləri avtomobili rahat şəkildə sürənlər, həmçinin, müştərilərlə ünsiyyətdə problem yaşamayan və şəhəri tanıyanlar işə qəbul olunur. Etiraf edim ki, son zamanlar bu xidmətdən istifadə edənlər elə də çox deyil".
"Ayıq sürücü xidməti"nin sürücüsü Əkbər adlı şəxs dedi ki, bir neçə ildir bu işlə məşğul olur: "Bu işlə məşğul olmaq istəyənlərdən əsas avtomobili yüksək səviyyədə idarə etmək tələb olunur. Maşını rahat şəkildə sürə bilən şəxs ayıq sürücü kimi çalışa bilər. Həmçinin, sürücünün müştərilərlə davranışı da önəmlidir. Nəzərə almaq lazımdır ki, əsasən spirtli içki qəbul edənlər bu xidmətdən istifadə edir. O zaman onların durumunu nəzərə alıb müştərilərlə daha həssas davranmaq lazımdır. Bu səbəbdən də səbrli və təmkinli sürücülərə daha çox üstünlük verilir. Bəzi şirkətlər daha çox şəhərin küçələrini yaxşı tanıyan sürücülərin peşəkar olduğunu bildirir. Ancaq belə deməzdim. Əsas maşını rahat şəkildə idarə edən, bir neçə il bu sahədə təcrübəsi olan və dediyim kimi, müştərilərlə nəzakətli davranan sürücülərə daha çox üstünlük veririk. Şəhərin küçələrinə qaldıqda isə, indi naviqator deyilən proqram var. Həmin proqramı istənilən sürücü telefonuna yükləyib lazım olan ünvanı rahat şəkildə tapa bilər".
Günel CƏLİLOVA
