"Laundru" kimyəvi təmizləmə mərkəzi: "Geyimlər etiketlərində olan dərəcə, yuma proqramına uyğun olaraq təmizlənir və belə olan halda, geyimlərdə olan xəstəliyin başqa birisinə keçməsi mümkünsüzdür" Şəbnəm Əliyeva: "Kimyəvi təmizləmədən sonra paltarlar mütləq yaxşıca havalandırılmalıdır"
Bu gün şəhərin istənilən məkanında kimyəvi təmizləmə mərkəzləri (camaşırxana) fəaliyyət göstərir. Belə məkanlar sahibindən geyimi alır, müəyyən müddətə onu yuyur, təmizləyir, ütüləyir və geri verir. Belə xidmətlərdən yararlanan insanlar az olmasa da, heç də hər kəs quru təmizləmə xidmətinə etibar etmir.
Paltarların kimyəvi təmizləmə mərkəzinin sanitar qaydalara necə əməl etdiyini öyrənmək məqsədilə camaşırxanalarla əlaqə saxladıq.
"Laundru" kimyəvi təmizləmə mərkəzinin nümayəndəsi bizimlə söhbətində bildirdi ki, paltarlar sanitar qaydalara uyğun şəkildə yuyulur: "Bizdə xüsusi paltaryuyan maşınlar var. O maşınlar xüsusi məhlul vasitəsilə hər gün təmizlənir. Və bizə etibar olunan geyimlər həm quru, həm yuyulma formasında təmizlənir. Gigiyenik qaydalara tam şəkildə riayət edirik.
Gün ərzində çoxlu sayda sifariş qəbul edirik. Edilən sifarişlərə 1 gün içində adam göndərilir və sifariş qəbul olunur. Mərkəzə gətirilən geyimlərin üzərinə alınma tarixi, ünvan, əlaqə telefonu və geyimin sahibinin adı yazılır. Quru təmizləməyə verilən geyimlər əvvəlcə yoxlanır. Geyimin hansı materialdan tikildiyi və ləkənin hansı tip ləkə olması aydınlaşdırılır. Çox ağır olan ləkələr əvvəlcədən ləkəçıxarıcı maddələrlə təmizlənir ki, yuyulduqdan sonra ləkələr kölgə kimi qalmasın. Ləkələrin ağırlığından asılı olaraq onlara vurulan ləkəçıxaran maddələr də dəyişir. Pas, dəmir, kakao, qəhvə, çəmənlik, mürəkkəb, yağ kimi ləkələrdə bu maddələrdən istifadə olunur. Sifarişi alanda ləkənin nə ləkəsi olduğunu öyrənirik. Ləkəli olmayan, gündəlik iş zamanı çirklənən geyimdirsə, onları ayrı təmizləyirik. Çıxarıla bilməyən ləkə, demək olar ki, yoxdur. Parça uzun müddət istifadə olunmursa və rəngi solursa, saralmalar yaranırsa, artıq belə saralmaları ağartmaq mümkün deyil. Yaxud, ləkə illərdir geyimin üstündə qalırsa, səhv yuyulursa, o ləkə geyimin canına hopur və belə ləkələri də çıxarmaq olduqca çətin olur.
Onu da deyim ki, geyimlər insanlara görə yox, etiketlərinə görə ayrılır. Yəni hər bir insanın geyimi ayrı maşında təmizlənmir. Geyimlər etiketlərində olan dərəcə, yuma proqramına uyğun olaraq ayrılır və təmizlənir. Belə olan halda, birinin geyimindən digərinə hər hansı bir xəstəliyin keçməsi qeyri-mümkündür, çünki istilik dərəcəsi o qədərdir ki, heç bir mikrob bu istiyə davam gətirmir. Geyimlərin üstündə olan etiket işarələrinə uyğun olaraq hansı geyimlərin quru təmizləməyə verilib-verilməməsini aydınlaşdırmaq mümkündür. Üzərində "A", "F", "P" hərfləri olan geyimlər quru təmizləmə üçün uyğun parçalardan olan geyimlərdir. Eyni zamanda ev şəraitində yuma zamanı da paltar etiketlərinə fikir vermək lazımdır".
Allerqoloq Şəbnəm Əliyevanın sözlərinə görə, kimyəvi təmizləmə zamanı istifadə olunan məhsullar zamanla orqanizmdə ən dəhşətli xəstəliyə - xərçəngə yol açır: "Ev əşyaları ev şəraitində təmizlənsə, daha yaxşı olar. Kimyəvi təmizləmədən sonra isə paltarlar mütləq yaxşıca havalandırılmalı və çırpılmalıdır. Yalnız bundan sonra həmin paltar digər paltarların olduğu dolaba asıla bilər. Bundan başqa, istifadə edilən maddənin tərkibi və onunla işləmə qaydaları təlimatda mütləq göstərilməlidir. Təlimatda tibbi maska və əlcək geyinmək, nə qədər müddət ərzində geyimlə təmasda olmaq mütləq qeyd edilməlidir".
Həkimin sözlərinə görə, hansısa kimyəvi vasitə, kimyəvi və tibbi məhsulların insan orqanizminə allergik təsiri varsa, mümkün qədər belə məhsullarla təmasdan qaçmalıyıq: "Bunun üçün lazım gələrsə, onlar hətta iş şəraitini də dəyişməlidirlər. Ən pis halda isə həmin şəxslər daim maska və əlcəkdən istifadə etməlidir. Bəzi kimyəvi məhsullar isə nəfəs yolu ilə orqanizmə daxil olur və allergik təsir göstərir. Nəfəslə yaranan allergik təsir zamanı maskalar və əlcəklərlə qorunmaq kifayət etmir".
Günel CƏLİLOVA
