Ədəbiyyat, incəsənət xalqın tarixini, onun keçmişini özündə yaşadan və gələcək nəslin qürur yerinə çevrilən, bir az da obrazlı desək, ilahi yaradılışdır. Sözdən başlanğıcını götürən səs də, rəng də təkcə insan ruhunu oxşamaq üçün deyil, ümumiyyətlə, dünya dediyimiz kürədə (bu gün hər yerindən od yağan daha qızmar kürə) bütün yaradılmışlarla "dil tapmaq üçün" ünsiyyət formasıdır.
Günü-gündən içində əridiyimiz, bəzən özümüzü yox kimi hesab etdiyimiz informasiya məkanında rahatlıq tapmayanda ya unudulmaqda olan kitaba üz tuturuq, ya da ki, gözlərimiz teatrların afişalarında ruhumuzun sarı simini tərpədən bir əsər axtarır ki, havasızlıqdan canımızı qurtaraq. Həyatın özünü, yaşadıqlarımızı əks etdirən nələrəsə həqiqətən də ehtiyac var bu gün.
Başı öz qayğılarına, problemlərinə qarışsa da səhnədə, kinoda həmişə gülərüz gördüyümüz (faciəni çıxmaq şərtilə), könlü nurlu, bizlərə mənəvi ehtiyaclarımızı qarşılamaqda kömək edən sənət adamları doğrudan da böyük ürək sahibidirlər. Çoxdan, uşaqlıqdan tanıdığım respublikanın əməkdar artisti Bəhruz Vaqifoğlunun gözəl bir sözü var. Deyir ki, yaradıcı adamın mütləq bir dərdi olmalıdır. Hər şey onun üzərində qurulur. Yaradıcı insan dərdindən qaçmalı deyil. Onun içərisinə girməlidir ki, orada bütövləşsin.
Bəli, dərdə belə fəlsəfi yanaşan, onu qazandığı uğurların bazisi kimi görən sənət adamının daxili dünyasını çəkmək üçün rənglərə ehtiyac yoxdur.
Bax, elə haqqında danışacağım sənət adamı da həm insanlarla dil tapa bilir, həm də dərdi ilə. Bəzən dərdi onu anlayır, insanlar isə...
Onu da çoxdan tanıyıram, lap çoxdan. Nizami RPİ-nin və Zaqatala RPŞ-nin "rəisi" olub...
Bu barədə bir azdan...
İnsanlar müxtəlifdir. Eləsi var ki, onunla ünsiyyət qurmaq su içimi kimi bir şeydir. İnsan da var onunla ünsiyyət qurandan sonra gərəkdir ki, çoxlu su içəsən. Çünki səni özünə elə çəkir, elə cəlb edir ki, sözünə, fikrinə, hissinə, duyğusuna təşnə olursan. Bu da bir Allah vergisidir, bu da bir istedaddır. Yaradıcı adamların kaprizi olmur desəm, yalan olar. Amma inanın ki, mən onun həyat və yaradıcılığına bələd olan biri kimi deyə bilərəm ki, onda kapriz deyilən şey yoxdur. Kinoda, filmdə həm rəhbərlik edir, həm də fəhləlik.
Deyəsən, sözümün üstündə sonacan durmadım. Axı yazmışdım ki, o bir çox RPİ-lərin, RPŞ-lərin polis rəisi olub. Əslində, onu tanıyanlar, içi mən qarışıq, ona "rəis" deyə müraciət edirik. Bu boyda "həngaməni" sizi yormaq üçün yazmadım. Elə bu kiçik yazım da vətənpərvər bir Azərbaycan övladı haqqındadır. Rəşad Nuri. O, 1971-ci ildə Bakı şəhərində mərhum jurnalistimiz Sabir Nurinin ocağında dünyaya göz açıb. Sözün halallığı ilə böyüyüb boya-başa çatıb. Ehtiyacın tərs şilləsini də dadıb dostumuz. Azərbaycan Dövlət Mədəniyyət və İncəsənət Universitetini bitirib. Rəşadla ilk tanışlığım da məhz ordan başlayıb. Hər gün axtarışdaydı, hər gün nəyisə düşünürdü, danışmağı sevməzdi. Sonuc işə gələndə isə bir də görərdik ki, universitetin rəhbərliyinin diqqətini çəkən tamaşa artıq səhnədədir.
Rəşad fikir adamıdır. Deyir ki, hər sözün, fikrin çəkisi olmalıdır. İnsan dilini tərpədəndə onun sözünün ağırlığından qarşısındakının çiyninə yük düşməsin, ürəyinə, qəlbinə işıq seli axsın...
"Məhkumlar" serialında, bir zamanlar Xəzər TV-də yayımlanan "Ölümsüzlər" layihəsində, torpaqlarımız uğrunda şəhid olan igid oğul və qızlarımızın ömür yolundan bəhs edən filmlərdə və bir çox seriallarda polis obrazı yaradıb. Teatr tənqidçisi olmasam da, onun sənət yoluna ekskursiya edəndə bir şeyi müşahidə etmişəm: çəkdiyi və çəkildiyi hər filmdə, serialda Azərbaycançılıq məfkurəsi var. "Tələ" serialında həm rejissor, həm də yaradıcı heyət Azərbaycanda tolerant mühitin, multikultural dəyərlərin, xalqların birgəyaşayış modelinin dövlətçiliyimizin möhkəmlənməsinə xidmət etdiyini göstərmək üçün sözün əsl mənasında sənət nümayiş etdirib.
Bir sirri də sizə açmaq istəyirəm. Rəşad özü də əvvəllər sıralarmızda olub. Sonradan yaradıcılıq onu bizdən qoparıb. Hətta qəzetlərin birində "Hüquq şöbəsi"nin müdiri kimi çoxlarının köməyinə, dadına çatıb.
Yazını hazırlamaq üçün ondan müsahibə götürəndə "kömək etmək" anlayışının üzərində baş sındırmasaq da, maraqlı dialoqumuz alındı. Kömək etmək nəcib bir əməldir, bütün ilahi dinlər onu dəstəkləyir, səmavi kitablar bu sözə dönə-dönə qayıdır. Elə söz arası: "Sənə polisin köməyi dəyibmi",- deyəndə sanki sözə bəndmiş kimi həssaslıqla danışmağa başladı və bir daha yəqin etdim ki, mən hələ onu yaxşı tanımamışam.
"Polisin sənə, mənə, bütün Azərbaycan xalqına köməyini ordumuzun olmadığı o çətin illərdə hər birimiz görmüşük. Sıralarından yüzlərlə şəhid verən polis deyilmi? Bu gün aprel döyüşlərindəki uğurumuzun başlanğıcı olan Horadizin alınmasında Azərbaycan Polisinin, Daxili Qoşunlarımızın göstərdiyi igidliyi, şücaəti unutmaq olarmı? Kömək deyəndə yada polis düşür, baş verən hər hadisədə insanların gözü birinci polisi axtarır. Bizə bəzən deyirlər ki, polisdən niyə belə çox çəkirsiniz, onun fəaliyyətini gündəmə gətirirsiniz. Biz isə deyirik ki, bu gün qazandığımız hər bir uğurda polisin əməyi var. Sabitlik adlı şirin nemətin qoruyucusu, digər hüquq-mühafizə orqanları ilə yanaşı, Azərbaycan Polisidir"...
Dostum mənə özəl bir sirrini açdı. Dedi ki, əvvəllər seriallarda polis obrazını canlandırmaq üçün ona uniforma lazım olurdu. Artıq belə bir problemi arxada qalıb. Onun polisə sevgisini, istəyini nəzərə alan DİN rəhbərliyi Rəşada uniforma hədiyyə edib.
Rəşad Nuri vətənpərvər sənətçidir. Son günlər Azərbaycan və Türkiyə teleməkanında yayımlanan, "NN-film"in təşkilatçılığı, Natiq Novruzovun rejissorluğu ilə çəkilən "Xüsusi təyinatlı İbad" filmi "Azərbaycan bayrağı" ordenli İbad Hüseynovdan bəhs edir. Məlumat üçün bildirək ki, "Xüsusi təyinatlı İbad" filminin ikinci hissəsi də artıq çəkilib başa çatmaq üzrədir və filmin ərsəyə gəlməsində, texniki təchizatında, hər zaman olduğu kimi, vətənpərvər ruhlu layihələrə qucaq açan DİN-in də əməyi danılmazdır.
Ümidvarıq ki, polisi sevən, onun işini görən və qiymətləndirən, müsbət polis obrazları ilə hər birimizin sevgisini qazanan Rəşad Nurinin uğurları ilə hələ çox tanış olmaq imkanımız yaranacaq.
O, iddiası istedadından böyük olanlardan deyil. Yeri gəlmişkən, bu yaxınlarda ATV-də yayımlanacaq "Yarpaqlar" serialında biz onu yenə də sevdiyimiz polis obrazında, polis uniformasında görəcəyik...
Hafiz TƏMİROV polis mayoru
