Vaqif Qarayev: "... yeri gəldi-gəlmədi, bu diaqnoz uşaqlara qoyulurdu"
Ölkəmizdə körpələrə ən çox qoyulan dörd səhv diaqnoz açıqlanıb. Bunu uzman pediatr Altay Abdullayev AZƏRTAC-a müsahibəsində bildirib. O qeyd edib ki, körpələrə ən çox qoyulan 4 səhv diaqnoz - kəllədaxili təzyiq, timus, hipoksiya (oksigen çatışmazlığı), əsəbdir: "Bu xəstəliklərlə əlaqədar kurs müalicələr alan kifayət qədər körpə uşaq var.
Azərbaycanda olduğum müddətdə mənə bu diaqnozla müraciət edən xəstələrin 99 faizinin tamamilə sağlam olduğunu müşahidə etmişəm. Çox vaxt körpələrdə olan bəzi normal əlamətlər xəstəlik kimi qəbul edilir və buna uyğun olaraq kurs müalicələrə başlanır. Bu əlamətlərdən ən çox rast gəldiklərimiz körpələrin ağız ətrafında müşahidə olunan göyərmələr, ağlayanda çənənin əsməsi, gecələr səbəbsiz şəkildə ağlamalar, dilin bayıra çıxarılmasıdır. Bildirmək istəyirəm ki, bu əlamətlər xəstəlik əlaməti deyil və körpələrdə rast gəlinən normal, fizioloji haldır. Əgər körpənin müayinəsində digər əlamətlər görünməzsə, bu əlamətlər müstəqil surətdə hər hansı xəstəliyin əlaməti hesab olunmur və tamamilə normal haldır. Bu əlamətlər müəyyən müddət sonra keçib gedəcək. Ona görə hər kəsə tövsiyəm uşaqlarına qarşı daha diqqətli olmaları və körpələri yersiz kurs müalicələrə məruz qoymamalarıdır".
Uzman pediatrın məlum fikri valideynlər arasında narahatlığa səbəb olub. Onlar övladlarına qoyulan diaqnozun dəqiq olub-olmamasına şübhə ilə yanaşırlar.
Həkim-pediatr Vaqif Qarayev "Bakı-Xəbər"ə açıqlamasında qeyd etdi ki, uşaqlara qoyulan 4 diaqnoz, əslində, diaqnoz deyil, hansısa xəstəliyin əlamətidir: "Son üç ilə qədər qeyd olunan diaqnozlar çox populyar idi. Yeri gəldi-gəlmədi, bu diaqnoz uşaqlara qoyulurdu. İlk öncə başlayım kəllədaxili təzyiqdən. Ümumiyyətlə, kəllədaxili təzyiq adı altında diaqnoz yoxdur. Bu hansısa xəstəliyin əlamətidir. Həkimlər tərəfindən uşaqlarda kəllədaxili təzyiq aşkar olunursa, o zaman onun səbəbini axtarsınlar.
Timus isə uşaqlarda olan bir vəzdir. Bu vəz uşaqların inkişafına və böyüməsinə heç bir maneçilik törətmir. Həmin vəz 1 yaşına qədər öz-özünə sovrulur.
Hipoksiya (oksigen çatışmazlığı) isə körpələrin çağa dövründə müşahidə olunur. Uşaq ağlayanda göyərir, çənəsi əsir kimi şikayətlər valideynlər tərəfindən səslənir. Bu xəstəlik deyil. Qeyd etdiyim əlamətlərdən narahat olmağa əsas yoxdur. Valideynlər çalışmalıdır ki, mümkün qədər uşaqları təmiz havada saxlasın.
Əsəbi oyaq olan uşaqlara gəlincə, əvvəllər bu cür körpələrə dava-dərman yazırdılar. Sonra bəlli oldu ki, uşaqda ciddi bir problem yoxdursa, dərman müalicəsinə ehtiyac yoxdur".
Günel CƏLİLOVA
