İlqar Hüseynli: "Artıq bu qərardan sonra heç kim ağacları nəinki kəsməyəcək, heç o barədə fikirləşməyəcək"
Artıq Bakıda ağacları qanunsuz kəsənlərlə bağlı cinayət işi açılacaq. Qeyd edək ki, paytaxtın Nizami rayonu ərazisində tikinti işlərinin aparılması zamanı müxtəlif cinsli (şam, sərv və qarağac) 9 ədəd ağacın məhv edilməsi, 20 ədəd ağaca isə zədələr yetirilməsi nəticəsində təbiətə 7920 manat məbləğində ziyan vurulması, eləcə də aparılan tikinti işləri ilə əlaqədar yaşıllıq sahəsinin kəsilməsinə dair hüquq verən rəsmi sənədlər təqdim edilməməsi ilə bağlı Ekologiya və Təbii Sərvətlər Nazirliyindən daxil olmuş material Baş Prokurorluqda araşdırılıb.
Baş Prokurorluğun mətbuat xidmətinin yaydığı məlumata əsasən, ilkin araşdırmalarla Meşə Məcəlləsinin və meşə qanunvericiliyi üzrə normativ aktların tələblərinin kobud surətdə pozularaq kəsməyə hüquq verən əsaslar olmadan külli miqdarda ziyan vurmaqla ağacların qanunsuz kəsilməsi hallarına yol verilməsi müəyyən edilib.
Həmin faktlarla bağlı Azərbaycan Respublikasının baş prokuroru tərəfindən 19 iyul 2017-ci il tarixdə Cinayət Məcəlləsinin 259.2.3 (qanunsuz ağac kəsmə) və 308.1-ci (vəzifə səlahiyyətlərindən sui-istifadə) maddələri ilə cinayət işi başlanıb.
Oksigen mənbəyi sayılan ağacları kəsilməməsi ilə bağlı uzun müddətdir mübarizə aparılır. Bu cür qanunsuz əməl edənlərə qarşı müəyyən məbləğdə cərimə tətbiq olunur. Ancaq indi tək cərimə yox, eyni zamanda cinayət işi də açılacaq.
Məsələ ilə bağlı fikir bildirən sosial sahə üzrə ekspert İlqar Hüseynli "Bakı-Xəbər"ə açıqlamasında qeyd etdi ki,
yaşıllıq zonalarının bilərəkdən məhv edilməsi ilə bağlı müxtəlif cəza metodları tətbiq olunur: "Onlardan biri də cərimə və ya cinayət işinin açılmasıdır. Vəzifə səlahiyyətindən sui-istifadə edib kütləvi şəkildə yaşıllıq zolağının məhvinə göz yumanlar az deyil. Bu hal xüsusən tikinti şirkətlərinə aiddir. Bir sıra tikinti şirkətləri paytaxt ərazisində olan yaşıllıq ərazilərinin bir qismini məhv etdilər və onların yerində binalar tikdilər".
Həmsöhbətimizin sözlərinə görə, ağacları qanunsuz kəsənlərlə bağlı cinayət işinin açılması düzgün qərardır: "Artıq bu qərardan sonra heç kim ağacları nəinki kəsməyəcək, heç o barədə fikirləşməyəcək".
Günel CƏLİLOVA
