Seyid Camal Əzimbəyli: "Belə olsa, bu, ortada olan doğru həqiqətlərin üzə çıxmasına rəvac verə bilər"
Məlum olduğu kimi, Milli Mətbuat Günü ilə əlaqədar olaraq Dini Qurumlarla İş üzrə Dövlət Komitəsi və Mətbuat Şurası "İslam həmrəyliyi və media" mövzusunda konfrans keçirib. Tədbirdə DQİDK rəhbərliyi, MŞ İdarə Heyətinin üzvləri, redaktorlar və mətbuat nümayəndələri iştirak edib.
Dini Qurumlarla İş üzrə Dövlət Komitəsinin sədri Mübariz Qurbanlı Azərbaycanda dini vəziyyətdən danışaraq DQİDK-nin həyata keçirdiyi tədbirlər barədə məlumat verib. Azərbaycanda son illərdə "Multikulturalizm ili" və "İslam həmrəyliyi ili"nin qeyd olunduğunu deyən komitə sədri İslam dünyasında həmrəyliyin yaradılması üçün Azərbaycanın bir sıra önəmli addımlar atdığını, Azərbaycanın bu sahədəki uğurlarının digər müsəlman ölkələri, o cümlədən İran, Səudiyyə Ərəbistanı, Rusiya kimi ölkələrdə də təbliğ olunacağını qeyd edib.
Tədbirdə çıxış edən mətbuat təmsilçiləri mövzu ilə bağlı bir sıra məsələlərə toxunaraq fikirlərini bildirib.
DQİDK-nin sədri M.Qurbanlı mətbuatda geniş yer alan nəzir qutuları mövzusuna toxunub. Komitə sədrinin sözlərinə görə, Qafqaz Müsəlmanları İdarəsi ilə məsələ qaldırıb ki, nəzir qutuları jurnalistlərin iştirakı ilə açılsın.
Ümumən buna münasibət necədir? Şərqşünas Seyid Camal Əzimbəyli buna müsbət prizmadan yanaşdığını bildirdi: "Hesab edirəm ki, nəzir qutularının media təmsilçilərinin iştirakı ilə açılması təqdir olunasıdır. Çünki son illər DQİDK ilə QMİ maarifləndirici, din-dövlət münasibətlərinin möhkəmləndirilməsi ilə bağlı birgə tədbirlər keçirir. Bu proseslərdə iştirak edən şəxs kimi deyirəm ki, hətta bölgələrdə analoji tədbirlər keçirilir. Hesab edirəm ki, belə tədbirlər təqdir olunasıdır və gerçək şəffaflığın da təmin olunması üçün əlverişli bir şərait yaradır. O üzdən, nəzir qutularının da medianın iştirakı ilə açılmasını dəstəkləyirəm. Çünki mətbuat nümayəndələri, azad mətbuat yazarlarının bu işdə iştirakı lazımdır. Ona görə ki, bəzən bilərəkdən, bəzən də bilməyərəkdən buna düzgün yanaşmayanlar olur. Belə olsa, bu, ortada olan doğru həqiqətlərin üzə çıxmasına rəvac verə bilər. Ona görə də bu təklifi alqışlayıram". Vidadi ORDAHALLI
