"AER Company Qrup" MMC - Adil Şərifov: "İqtisadiyyat Nazirliyi tərəfindən adları açıqlanan məhsullar satışdan yığışdırılıb"
"BAND MİLK" MMC: "Nazirliyin yoxlanışından keçməyən məhsullarımız bazardan yığışdırılıb"
İsti yay günlərinin vazkeçilməzi olan dondurmanı böyükdən kiçiyə sevməyən, demək olar ki, yoxdur. "Qovurucu" istilərdə sərinləşdirici içkilərə nə qədər çox ehtiyac duyulursa, elə dondurmaya da o qədər tələbat olur. Bununla da insanların əvəzsiz qidasına çevrilən dondurma ilə bağlı bəzən müxtəlif suallar da ortaya çıxır. Əsasən sərinləşdirici sayılan dondurmanın keyfiyyətli olub-olmaması, satışda olan dondurmanın istifadə müddətinin keçib-keçmədiyi sual doğurur.
Elə bu günlərdə İqtisadiyyat Nazirliyi tərəfindən aparılan araşdırma zamanı istehlak bazarının qorunması məqsədilə görülən tədbirlər çərçivəsində müxtəlif ticarət obyektlərində satışda olan ərzaq məhsullarının ilkin laborator müayinəsi zamanı bir sıra dondurmaların tərkibində insanların həyat və sağlamlığı üçün təhlükə yaradan mikroorqanizmlərin normativ sənədlərlə yol verilən miqdardan artıq olduğu müəyyən edilib.
Nazirlik tərəfindən yayılan məlumatda qeyd olunur ki, mövcud pozuntuların daha çox istehsal mənşəli olduğu nəzərə alınaraq, qanunvericiliyin tələblərinə uyğun olaraq, İqtisadiyyat və Səhiyyə nazirliklərinin nümayəndələri tərəfindən dondurma istehsal edən bir sıra sahibkarlıq subyektlərində birgə nəzarət tədbirləri həyata keçirilib və həmin müəssisələrdə istehsal edilən və satış üçün nəzərdə tutulan məhsulların müayinəsi üçün müəyyən olunmuş qaydada nümunələr götürülüb.
Götürülmüş nümunələrin laborator müayinəsi nəticəsində:
- "AER Company Qrup" MMC-nin istehsal etdiyi "Çudo" şokoladlı, "AER" plombir şokoladlı, "AER" plombir vanilli, "Yasif" plombir və "Melisa";
- "Band Milk" MMC-nin istehsal etdiyi "Nostalji" plombir, "Briket-krem brule" və vafli stəkanda olan qaymaqlı-şokoladlı;
- fiziki şəxs Səringül Yusubovanın istehsal etdiyi "Bakinskiy privet" plombir, "Meqapolis" şokoladlı plombir, "Cappuçino" qəhvəyi, "Matryoşka" plombir, "Selena" şokoladlı plombir, "Panda" südlü, "Meçta" şokoladlı plombir, "Arktika" şokoladlı plombir, "Tanqo" şokoladlı və "Tanqo" cemli;
- fiziki şəxs Müzəffər Poladovun istehsal etdiyi "Mono Quality" badamlı, "Bakı gecələri" plombir, "Armada", "Eskimo Yoloçka", "Yeni şəhər" plombir;
- "S.A.B.A. Şirkəti" MMC-nin istehsal etdiyi "İçəri şəhər" qəhvəyi, "İçəri şəhər" qəhvəli, "Prestij" çiyələkli, "Prestij" qozlu, "Əsl" plombir;
- "A.Y.S-60" MMC-nin istehsal etdiyi "Südlü" klassik və "A-klass" dondurmalarında bağırsaq çöpləri qrupundan olan bakteriyaların (koliformlar) miqdarının normativ sənədlərdə nəzərdə tutulmuş miqdardan artıq olduğu müəyyənləşdirilib.
Eyni zamanda, götürülmüş nümunələrin laborator müayinəsi nəticəsində "AER Company Qrup" MMC-yə məxsus "Çudo" şokoladlı, "AER" plombir şokoladlı və "AER" plombir vanilli, habelə fiziki şəxs Səringül Yusubovaya məxsus "Bakinskiy privet" plombir, "Meqapolis" şokoladlı plombir, "Cappuçino" qəhvəyi, "Matryoşka" plombir, "Selena" şokoladlı plombir və "Panda" südlü dondurmalarında mezofil-aerob və fakultativ-anaerob mikroorqanizmlərin də miqdarının normativ sənədlərlə müəyyən olunmuş normativdən artıq olduğu aşkarlanıb.
Aşkar olunmuş qanun pozuntuları ilə əlaqədar adları çəkilən dondurma istehsalçılarına dondurmaların istehsalının dayandırılması, bu məhsulların ticarət şəbəkəsindən geri çağırılması kimi məhdudlaşdırıcı tədbirlər tətbiq edilib və istehsalat sahəsində müvafiq sanitariya-gigiyenik və dezinfeksiya tədbirlərinin həyata keçirilməsi barədə göstəriş verilib.
Siyahıda adı yer alan "AER Company Qrup" MMC-nin müşahidə şurasının sədri Adil Şərifov "Bakı-Xəbər"ə açıqlamasında qeyd etdi ki, İqtisadiyyat Nazirliyi tərəfindən adları açıqlanan məhsullar satışdan yığışdırılıb: "Həmin məhsullar artıq 10 gündür bazardan yığışdırılıb. Biz bütün iradları nəzərə alıb nazirlik tərəfindən göstərilən bütün nöqsanları aradan qaldırırıq. Nə zaman istəsəniz, istehsalçılar belə, şirkətə daxil olub dondurmanın hazırlanması prosesinin necə icra olunduğunu canlı şəkildə görə bilər".
Siyahıda adı qeyd olunan "BAND MİLK" MMC-nin rəsmi nümayəndəsi bizimlə söhbətində bildirdi ki, adları açıqlanan məhsullar bazardan tamamilə yığışdırılıb və nazirliyin göstərişləri yerinə yetirilib: "Nazirliyin yoxlanışından keçməyən məhsullarımız bazardan yığışdırılıb. Hər bir dondurmada bağırsaq çöpləri qrupundan olan bakteriyalar olur, sadəcə, normasının bir az yüksək olması aşkarlanıb və tədbirlər görülüb, həmin məhsullar firmaya geri qaytarılıb. Həmçinin, nazirliyin bununla bağlı digər tapşırıqları da yerinə yetirilib".
Azad İstehlakçılar Birliyinin (AİB) sədri Eyyub Hüseynov "Bakı-Xəbər"ə açıqlamasında qeyd etdi ki, hələ də bazarda tərkibi naməlum olan dondurmalar satılır: "Biz iki il öncə həmin firmalardan birinin rəhbərinin həbs olunmasının da şahidi olduq. Amma şirkət rəhbəri haqqında cinayət işi açıldığı bir vaxtda həmin dondurmaların reklamı aparılırdı. Bunun səbəbi odur ki, ölkədə qida təhlükəsizliyinə dair qanun yoxdur. Həmçinin, təhlükəli qida məhsullarının geri çağırılma mexanizmi yoxdur. Xatırladım ki, ölkə Prezidenti bu il fevral ayının 10-da Qida Təhlükəsizliyi Agentliyinin yaradılması haqqında xüsusi fərman imzalayıb. Hazırda həmin agentliyin yaradılması üzrə işlər aparılır".
Günel CƏLİLOVA
