Aytəkin Kamranqızı: "Abort çox zaman uşağın xəstə doğulacağı müəyyən edildikdə, uşağın və ya anasının sağlamlığında böyük problemlər olduğu zaman həyata keçirilir"
Nailə Hüseynova: "Yaşı 18-dən aşağı olan yeniyetmələr arasında abort halları daha çox qeydə alınır"
Hər bir qadın dünyaya sağlam körpə gətirməyi özünün müqəddəs missiyası hesab edir. Amma çox təəssüf ki, bir çox qadınlar müəyyən səbəblərdən dolayı hamiləliyi arzuolunmaz hesab etdiyi üçün, süni yolla (abort etdirməklə) pozdurur. Bunun üçün müxtəlif səbəb və bəhanələr gətirirlər.
Açıqlanan statistik rəqəmlərə əsasən, Azərbaycanda abort edən qadınların sayı artıb. Qeyd olunur ki, 2016-cı ildə Azərbaycanda 34569 abort edilib. 2015-ci ildə abortların sayı 27452, 2014-cü ildə 27220, 2013-cü ildə isə 27892 olub.
2013-cü ildə ölkədə 15-49 yaşlı hər 1000 qadından 10,4-ü, 2014-cü ildə 10,1-i, 2015-ci ildə 10,3-ü abort etdiyi halda, 2016-cı ildə hər 1000 qadına düşən abortların sayı artaraq 13-ə yüksəlib.
Ötən il edilən abortların 20323-ü 15-29 yaşlı qadınların payına düşür.
İllər üzrə müqayisə etdikdə 20 yaşa qədər olan qadınlar arasında abort sayı azalsa da, 20-24 və 25-29 yaş qrupu üzrə abort edənlərin sayı artıb.
Keçən il 15-17 yaşlı qadınlar tərəfindən 19 (2015-ci ildə 50), 18-19 yaşlı qadınlar tərəfindən 1242 (2015-ci ildə 1425), 20-24 yaşlı qadınlar tərəfindən 7773 (2015-ci ildə 5983), 25-29 yaşlı qadınlar tərəfindən 11289 (2015-ci ildə 8573) abort edilib.
2016-cı ildə ölkədəki 15-29 yaşlı qadınların hər 1000 nəfərindən 16,8-si abort edib. Bu rəqəm də əvvəlki illərə nisbətən yüksəkdir. Belə ki, 2013-cü ildə hər 1000 qadına düşən abortların sayı 12,2, 2014-cü ildə 12, 2015-ci ildə 12,9 olub.
Məsələ ilə bağlı fikir bildirən sosioloq Aytəkin Kamranqızı bizimlə söhbətində qeyd etdi ki, abort halları, Azərbaycanda olduğu kimi, bütün dünyada geniş yayılıb. Buna görə hətta bəzi ölkələrdə abort edənlər və aborta məcbur edənlər cinayətə cəlb edilir: "Əgər hamiləlik təcavüz nəticəsində yaranıbsa, natamam ailədədirsə, arzuolunmaz münasibətdən yaranıbsa, ananın həyatı uşaq böyütmək üçün uyğun deyilsə, uşaq abort edilə bilər. Çünki bu uşaqların gələcəyi şübhə altındadır".
Həmsöhbətimizin sözlərinə görə, abort çox zaman uşağın xəstə doğulacağı müəyyən edildikdə, uşağın və ya anasının sağlamlığında böyük problemlər olduğu zaman həyata keçirilir. Övlad istəməyən təsadüfi hamilələr isə hamiləliyin ikinci həftəsində buna son verməyi qərara alır. Amma bilə-bilə qız övladını öldürənlər də az deyil.
Həkim-ginekoloq Nailə Hüseynova bildirdi ki, qadınlar hamiləliyin pozulması üçün daha çox 25-29 və 30-34 yaş aralığında tibb müəssisələrinə müraciət edir: "Rəsmi statistikada yaşı 18-dən aşağı olan yeniyetmələr arasında abort halları daha çox qeydə alınır. Lakin vurğulamaq istəyirəm ki, bu göstərici yeniyetmə qızlarımızın hamiləliyi, əxlaqi problemi kimi qələmə verilməməlidir. Bu göstərici yetkinlik yaşına çatmadan ailə quran yeniyetmələr arasında abortların sayıdır. Yəni erkən nikahlardan irəli gələn bir göstəricidir. Yeniyetmə ailə qurur, hamilə qalır, lakin hamiləlik zamanı meydana çıxan fəsadlar hamiləliyi başa çatdırmağa imkan vermir. Bu halda hamiləlik abortla nəticələnir. Yeniyetmə hamiləliyi risqli hamiləlikdir. İnkişafdan qalmış hamiləlik, dölün bətndaxili inkişaf qüsuru, mamalıq ağırlaşmaları bu yaşda daha yüksək tezliklə rast gəlinir.
Əlbəttə, 40-49 yaşlı qadınlar arasında da abort halları qeydə alınır. İllərlə sonsuzluğun müalicəsində köməkçi reproduktiv texnologiyaların tətbiqi gec reproduktiv yaş dövründə olan qadınlara da ana olmaq sevincini yaşatmağa imkan verir. Lakin bu halda da hamiləliyin özbaşına və ya mamalıq ağırlaşmalarının meydana çıxması ilə əlaqəli abortla nəticələnməsi mümkündür".
Günel CƏLİLOVA
