İyulun 18-də Respublika Müalicəvi Diaqnostika Mərkəzinin nəzdindəki Bakı Ürək Mərkəzində ürək xəstəliklərinin profilaktikası, erkən diaqnostikası və açıq ürək əməliyyatlarının icrası sahəsində əldə olunan nailiyyətlərə həsr olunan mətbuat konfransı keçirilib.
Tədbirdə Bakı Ürək Mərkəzinin ürək-damar cərrahı, deputat R.Mahmudov, ET Kardiologiya institutunun Ürək çatışmazlığı şöbəsinin böyük elmi işçisi, professor T.Cahangirov və Elmi Cərrahiyə Mərkəzinin cərrahı, professor F.Abdullayev iştirak edib.
Tədbirdə bildirilib ki, ürək-damar xəstəlikləri bütün dünyada əlillik və ölüm hallarına görə birinci yerdədir. Ölkəmizdə də qeydə alınan ölüm hallarının 57,8 faizi ürək-damar xəstəlikləri və qan dövranı sistemlərinin pozulması ilə bağlıdır.
R.Mahmudov öz çıxışında qeyd edib ki, bu gün ölkəmizdə hətta ən ağır əməliyyatları icra edən, tibbi və kadr baxımından tam təmin olunmuş, yüksək standartlara cavab verən kifayət qədər tibb müəssisəsi var. Ölkədə Bakı Ürək Mərkəzi kimi tibb müəssisəsinin fəaliyyət göstərməsi Azərbaycan səhiyyəsinin növbəti uğurudur. Mərkəzin yaradılmasında məqsəd Azərbaycanda ürək xəstəliklərinin vaxtında aşkarlanmasında, müalicəsində beynəlxalq standartlara uyğun xidmətin, keyfiyyət sisteminin tətbiqinə təkan vermək, həmçinin bu sahədə çalışan peşəkarların dolğun fəaliyyətinə hərtərəfli şərait yaratmaqdır.
Bildirilib ki, "Bakı Ürək Mərkəzi"ndə həm böyüklərdə, həm də uşaqlarda ən son texnoloji nailiyyətlərə əsaslanan avadanlıq və cihazların köməyi ilə müayinə və müalicə, eləcə də invaziv-kardioloji və açıq cərrahiyə əməliyyatları həyata keçirilir. Cərrahiyə əməliyyatından sonra xəstələrin müalicəsi davam etdirilir, onlar kardioreabilitasiya dövründə hərtərəfli tibbi xidmətlə əhatə olunurlar. 4 reabilitasiyanın - nevroloji, ortopedik, kardioloji və pediatrik reabilitasiyanın aparılmasının eyni mərkəzdə cəmləşməsi də RMDM-i digər tibb müəssisələrindən fərqləndirən cəhətdir.
Mərkəzin poliklinikası da Azərbaycanda səhiyyə islahatlarının yüksək səviyyədə reallaşdırılmasına dəlalət edir. "Bakı Ürək Mərkəzi"ndə xəstələrin qəbulu və müalicəsini yüksək ixtisaslı həkim-mütəxəssislər aparır. Bu tibb müəssisəsinin həkim-kardioloqları əhaliyə ürək-damar sisteminin vəziyyətinin qiymətləndirilməsi, ürək-damar xəstəlikləri üzrə risq amillərinin aradan qaldırılması və profilaktikasında, uzunmüddətli müşahidə aparılmasında və hərtərəfli müalicəsində yardımçı olurlar. Bütün bu göstəriciləri özündə birləşdirən Respublika Müalicəvi Diaqnostika Mərkəzi Amerika Birləşmiş Ştatlarının qızıl sertifikatına - JCI (Joint Commission International) layiq görülüb, mərkəzi laboratoriyası isə beynəlxalq ISO sertifikatını alıb.
Baki-xeber.com
