Şahin Camalov: "Mümkün qədər qənaətə üstünlük verəcəklər"
Məlum olduğu kimi, Tarif (qiymət) Şurasının 2017-ci ilin 14 iyul tarixində keçirilmiş növbəti iclasında Azərbaycan Respublikası Dövlət Neft Şirkətinin (SOCAR) müraciəti əsasında "Aİ-92" markalı avtomobil benzininin pərakəndə satış qiymətinə yenidən baxılaraq, müvafiq tarif tənzimlənməsi həyata keçirilib. Qurumun iclasında "Aİ-92" markalı avtomobil benzininin pərakəndə satış qiyməti 1 litr üçün 90 qəpik səviyyəsində təsdiq edilib.
Tarif Şurası qeyd edib ki, qiymət dəyişikliyindən sonra da Azərbaycanda "Aİ-92" markalı avtomobil benzininin pərakəndə satış qiyməti əksər MDB və region ölkələri ilə müqayisədə aşağı olacaq. Belə ki, hazırda "Aİ-92" markalı avtomobil benzininin pərakəndə satış qiyməti 1 litr üçün Gürcüstanda 0,86, Rusiyada 0,61, Qazaxıstanda 0,43, Belarusda 0,59, Ukraynada 0,98 ABŞ dolları təşkil edir.
O da məlumdur ki, avtomobil yanacağının qiymətinin ucuz olması bu və ya digər dərəcədə tıxacların yaranmasına zəmin yaradır. Görürsən ki, bəzi insanlar səbəbsiz, məqsədsiz yerə maşın sürür. Bu da tıxacların yaranmasına gətirib çıxarır. Hər halda, yanacağın qiymətinin artması bunun qabağını qismən alacaq. Eyni zamanda israfçılığın qarşısını alacaq. İnsanlar yanacağı qənaətlə işlətməli olacaqlar. Tıxaclar nə qədər az olsa, bu bir o qədər əhalinin rahatlığının təmin olunmasına öz müsbət təsirini göstərəcək. O baxımdan maraqlıdır, ekspertlər bu məsələyə necə baxır?
Məsələyə münasibət bildirən "Təhlükəsiz Yol" Alyansının koordinatoru Şahin Camalov bildirdi ki, bundan sonra tıxaclar bir qədər azala bilər: "Hələlik bu müşahidə olunmur. Yəni hazırda şəhərdə bunun əlamətləri görünmür. Ancaq bəlli bir müddətdən sonra tıxaclar buna görə bir az azala bilər. Çünki benzinin qiymətində müşahidə olunan artım 30 faiz həcmindədir. Bu da istər-istəməz bəzi avtomobil sahiblərinin büdcəsinə təsir göstərir. O üzdən, belə vəziyyət ola bilsin ki, tıxacların azalmasına təsir etsin. Nəticədə bunu əsas gətirən avtomobil sahibləri mümkün qədər qənaətə üstünlük verəcəklər. Çünki yanacaq ucuz olanda, elə sürücü var beş addım yolu da avtomobillə gedir. Nəticədə yollarda avtomobil sıxlığı artır. Çox güman ki, bundan sonra avtomobildən istifadə edənlərin sayında müəyyən azalma olacaq".
Vidadi ORDAHALLI
