Ölkəmizdə möhtərəm dövlət rəhbərimizin təsdiq etdiyi "Hemofiliya və talassemiya irsi qan xəstəlikləri üzrə Dövlət Proqramı"na və Heydər Əliyev Fondunun təşəbbüsü ilə keçirilən "Talassemiyasız həyat naminə" proqram layihəsinə uyğun olaraq paytaxtda və bölgələrdə qanvermə aksiyaları keçirilir.
"Qan ver, yaşat!" devizi ilə gerçəkləşən bu nəcib və humanist aksiyada daxili işlər orqanlarının əməkdaşları da fəal iştirak edir.
DİN-in Mətbuat xidmətindən aldığımız məlumata görə, növbəti belə tədbir Qusar Rayon Polis Şöbəsi, Şahdağ Polis Bölməsi və rayonun Mərkəzi Xəstəxanasının birgə təşkilatçılığı ilə keçirilib.
Aksiyada Qusar RPŞ-nin rəisi, polis polkovniki Zaur Bədəlov, rəis müavinləri, eləcə də Şahdağ PB-nin rəisi, polis mayoru Səbuhi Rüstəmov birincilər sırasında olmaqla, şəxsi heyət iştirak edib. Polis polkovniki Z.Bədəlov bu nəcib təşəbbüsə qoşulmağı səhhəti imkan verən hər bir əməkdaşın vətəndaşlıq borcu olduğunu diqqətə çatdırıb.
Polis əməkdaşları əvvəlcə tibbi müayinədən keçirilib. Sonra isə qan vermək üçün masalara yaxınlaşıb.
Qeyd edək ki, gün ərzində yığılmış qan Mərkəzi Qan Bankına təhvil veriləcək və talassemiya xəstəliyindən əziyyət çəkən insanların müalicəsində istifadə olunacaq.
Baki-xeber.com
