Hacıəmi Atakişiyev: "Abort reklamının qadağan olunması hamiləliyin süni dayandırılmasının qarşısını alacaq"
Prezident İlham Əliyev Milli Məclisin "Əhalinin sağlamlığının qorunması haqqında" Qanuna etdiyi son əlavələri təsdiq edib. Qanunun 11-ci maddəsinə üçüncü və dördüncü hissələr əlavə edilib. Edilən əlavələrdən biri də hamiləliyin süni yolla pozulması və süni mayalanma üzrə tibbi xidmət reklamının qadağan olunmasıdır.
"Azərbaycan Respublikasında yalnız həkim resepti olmadan buraxılan dərman vasitələri, istifadəsinə (tətbiqinə) müvafiq icra hakimiyyəti orqanı tərəfindən icazə verilmiş tibbi təyinatlı texnika, müalicə, profilaktika, diaqnostika və reabilitasiya metodları reklam oluna bilər. Dərman vasitələrinin, tibbi təyinatlı texnikanın və məmulatların, tibbi xidmətlərin reklamına tələblər "Reklam haqqında" və "Dərman vasitələri haqqında" Azərbaycan Respublikasının qanunları ilə müəyyən olunur".
Süni mayalanma və abort xidmətinin reklamının qadağan olunmasını mütəxəssislər müsbət qarşılayır.
Azərbaycan Reklamçılar İttifaqı İctimai Birliyinin sədri Hacıəmi Atakişiyev "Bakı-Xəbər"ə açıqlamasında qeyd etdi ki, "Reklam haqqında" Qanuna bu əlavələrin edilməsi düzgündür: "Bu gün bir sıra kütləvi informasiya vasitələrində (KİV) süni mayalanma və hamiləliyin süni yolla dayandırılması haqqında reklamlara rast gəlinir. Bu hal yalnız televiziyada yaşanır. Qeyd etmək lazımdır ki, küçə reklamlarında bu hala rast gəlinmir. Televiziyada yayımlanan bu tip reklamın adı gizli reklamdır. Əsasən hər hansı bir tibbi verilişə dəvət olunan həkimlər məlum mövzu barədə fikir bildirir. Əsasən Türkiyədən dəvət olunan həkimlərin iştirakı ilə aparılan veriliş zamanı gizli reklama rast gəlinir. Gizli reklam odur ki, 45 dəqiqə-1 saat ərzində yayımlanan verilişdə danışan həkim çalışdığı xəstəxanada abortun fəsadsız aparılması barədə danışır. Televiziyalarda sağlamlıq verilişlərinin sayı həddindən artıq çoxdur. O verilişlərdə iştirak edənlər məsləhət adı ilə gizli reklam xidmətindən istifadə edir. "Reklam haqqında" Qanunda bu kimi hallara qarşı hər hansı bir məhdudiyyət tətbiq olunmamışdı. Ancaq Prezident İlham Əliyev bu işə bir son qoyacaq. Abort reklamının qadağan olunması hamiləliyin süni dayandırılmasının qarşısını alacaq".
Günel CƏLİLOVA
