Ölkəmizin elm aləmində xüsusi yeri olan Azərbaycan Tibb Universiteti yüksək səviyyəli kadrlar yetişdirməklə yanaşı, həm də müəllim heyətinin yaxşı istirahətini təşkil edir. Bu məqsədlə ATU-nun nəzdində "Təbib" istirahət mərkəzi fəaliyyət göstərir.
Nabranda yerləşən "Təbib" istirahət mərkəzi ATU əməkdaşlarının hərtərəfli istirahətini təmin etmək məqsədilə yaradılıb. 1994-cü ilin mayında bu idman-sağlamlıq düşərgəsi Həmkarlar İttifaqı Komitəsinin sərəncamına verilib. Elə həmin vaxtdan etibarən "Təbib" istirahət düşərgəsində əməkdaşların istirahətini daha yaxşı təşkil etmək məqsədilə hər ilin may-iyun aylarında təmir və abadlıq işləri aparılır. Hazırda hər il 800 nəfərə yaxın professor-müəllim heyəti, texniki işçilər və onların ailələri, o cümlədən tələbələr bu mərkəzdə istirahət edə bilir. 2013-cü ildən etibarən "Təbib" istirahət ocağının maliyyələşdirilməsi tam olaraq Həmkarlar İttifaqı Komitəsinin ixtiyarına verilib.
Bu günlərdə mərkəzin nəzdindəki yeməkxanada da təmir işləri başa çatıb. Bu münasibətlə keçirilən açılış mərasimində universitetin professor-müəllim heyəti iştirak edib. ATU-nun rektoru, professor Gəray Gəraybəyli bildirib ki, işçilərin istirahətinin səmərəli və rahat keçməsini təmin etmək məqsədilə buradakı şərait mütəmadi olaraq yaxşılaşdırılacaq: "Bu hələ başlanğıcdır. İlk olaraq yeməkxananı yenidən qurduq. Kollektivimizin istirahəti bizlər üçün onların fəaliyyəti qədər önəmlidir".
G.Gəraybəyli bildirib ki, səhiyyə naziri Oqtay Şirəliyev də "Təbib" istirahət mərkəzində olub və buradakı şəraiti müsbət qiymətləndirib, vəziyyətin daha da yaxşılaşdırılması üçün təkliflərini səsləndirib. Eyni zamanda, yay ayları olması ilə əlaqədar, ATU-nun rektoryanı şurasının iyul ayına olan toplantısının da Nabranda, təbiət qoynunda keçirilməsi qərara alınıb. Beləliklə, "Təbib" istirahət düşərgəsində baş tutan iclas zamanı rektor Gəray Gərabəyli iştirakçılar qarşısında gündəlikdə duran məsələlərlə bağlı məruzə edib. Daha sonra 2016/2017-ci tədris ilinin yaz semestrinin imtahan sessiyasının nəticələri haqqında dekanların və tədris şöbəsinin hesabatı dinlənib. Yay semestri üzrə məsul şəxs Mahir Quliyev bu tədris ilindəki son semestrin təşkili haqqında ətraflı məlumat verib.
ATU-nun Həmkarlar İttifaqı Komitəsinin sədri Cahangir Qasımov isə 2017-ci il tətil dövründə Nabrandakı "Təbib" istirahət düşərgəsində əməkdaşların istirahətinin təşkili haqqında məlumatı səsləndirib.
Şuranın iclası başa çatdıqdan sonra ATU əməkdaşlarının istirahətinə də vaxt ayrılıb.
Baki-xeber.com
