Bahadur Bilalov: "ASAN viza" sisteminin tətbiq edilməsi turizmin inkişafına xeyli təsir göstərib"
Turizm sənayesinin inkişafına yaradılan şərait ölkəmizə gələn turistlərin sayına təsir edir. Ölkəmizə gələn turistlərin sayı günü-gündən artır. Açıqlanan statistik rəqəmlər də bunu təsdiq edir.
2017-ci ilin birinci yarısında ölkəmizə 1 milyon 199 min 667 nəfər xarici vətəndaş səfər edib. Bu göstərici 2016-cı ilin eyni dövrü ilə müqayisədə (966 min 497 nəfər) 24 faiz artım olduğunu göstərir.
Bu ilin birinci yarısında ölkəmizə gələn xarici vətəndaşların ümumi sayında Rusiya 374 min 491 nəfərlə (17 % artım) ilk yerdə qərar tutub. Sonrakı yerlərdə Gürcüstan (254 425 nəfər, 4 % artım), İran (180 103 nəfər, 89 % artım), Birləşmiş Ərəb Əmirlikləri (BƏƏ) (44 196 nəfər, 338 % artım), Ukrayna (27 342 nəfər, 14 % artım) və İraq (19 355 nəfər, 75 % artım) vətəndaşlarının xüsusi çəkisi daha çox olub. Bu dövrdə Türkiyə Respublikasından ölkəmizə 138 min 692 nəfər gəlib ki, bu da ötən illə müqayisədə 7,6 % azalma deməkdir.
Qeyd edək ki, cari ildə Azərbaycana səfər edən ərəb ölkələri turistlərinin sayında böyük artım nəzərə çarpır. 2016-cı ilin ilk altı ayı ilə müqayisədə bu ilin ilk yarısında Omandan 16 dəfə, Küveytdən 8, Səudiyyə Ərəbistanından 6, Qətərdən 5, Mərakeşdən 5, BƏƏ-dən 4,4, Pakistandan 3,5, Əlcəzairdən 3,5, İordaniyadan 2,2, Türkmənistandan 2 və İraqdan təxminən 1,5 dəfə çox turist ölkəmizə gəlib.
Regionlar üzrə isə MDB ölkələri (12 %), Avropa İttifaqı ölkələri (13 %) İran Körfəzi və Yaxın Şərq ölkələri (117 %), Asiya ölkələri (64,4 %), Afrika ölkələri (72 %), Amerika və Avstraliyadan (22,8 %) ölkəmizə səfər edən xarici vətəndaşların sayında da artım baş verib.
Turizm sahəsi üzrə ekspert Bahadur Bilalov bizimlə söhbətində qeyd etdi ki, Azərbaycanın sosial-iqtisadi inkişafı turizmin inkişafına səbəb olub: "Turist axınını istənilən şəxs paytaxt Bakı ərazisində və ya istənilən bölgədə müşahidə edə bilər. Turistlərin ölkəmizə maraq göstərməsinin əsas səbəblərindən biri keçirilən beynəlxalq əhəmiyyətli tədbirlərdir. Həmin tədbirlər bitsə belə, onların sorağı uzun müddət dillərdə qalır".
Həmsöhbətimizin sözlərinə görə, "ASAN viza" sisteminin tətbiq edilməsi turizmin inkişafına xeyli təsir göstərib: "Qanunlara edilən bəzi əlavə və dəyişikliklər, "ASAN viza" və digər bu kimi addımlar turistlərin rahat şəkildə ölkəmizə səfər etməsinə səbəb olub. Turist axını Azərbaycanda yeni iş yerlərinin yaradılması üçün vacib əhəmiyyət kəsb edir. Digər tərəfdən isə bu, Azərbaycana valyuta gəlməsi deməkdir".
Ekspert onu da bildirdi ki, son iki ildə rusların turizm ölkəsi olaraq Azərbaycana marağı artıb. Bu vəziyyət isə, öz növbəsində, aviareyslərin də sayının çoxalmasına gətirib çıxarır: "Rusiyadan ölkəmizə daha çox turistin gəlməsilə bağlı olaraq son dövrlər şimaldan Azərbaycana edilən aviareyslərin sayında artım müşahidə edilir. Belə ki, artan bu reyslərin bir qismi də mövsümü reyslərdir. Yəni turizm mövsümü ilə bağlı yaradılan reyslərdir. Bu baxımdan Rusiyadan ölkəmizə gələn turistlərin sayının çoxalması əslində ondan xəbər verir ki, proses birbaşa həmin ölkə turistlərinin Azərbaycana marağının artması ilə bağlıdır.
Yəni həmin turistlərin marağı artdığı üçün, nəticə etibarilə, proses aviareyslərin sayının çoxalmasına rəvac verib. Turizmin inkişafında bilirsiniz ki, reyslər çox vacibdir. Çünki birbaşa reyslərin sayının artması həmin ölkələrin turizmə marağının artmasına da gətirib çıxarır. Əvvəlki illərdə də Rusiyadan ölkəmizə gələn turistlərin sayı çox olub. Amma onların da bir qismi Rusiya vətəndaşı olan azərbaycanlılar idi. Bununla belə, son iki ildə Rusiyadan ölkəmizə gələnlərin sayında artım var ki, bu da rusların turizm ölkəsi kimi Azərbaycana marağının artmasından xəbər verir".
Günel CƏLİLOVA
