Hacıəmi Atakişiyev: "Reklamla bağlı qanunvericiliyin tələblərinin bəzi yayımçılar tərəfindən pozulması qanunvericilikdə olan boşluqdan irəli gəlir"
"Reklamla bağlı qanunvericiliyin tələblərinin bəzi yayımçılar tərəfindən pozulması halları müşahidə edilir". Bu barədə Milli Televiziya və Radio Şurasının (MTRŞ) Monitorinq şöbəsinin müdiri Təvəkkül Dadaşov media nümayəndələrinə açıqlamasında deyib.
Onun sözlərinə görə, xüsusilə bir saata düşən reklamın həcmi ilə bağlı pozuntular diqqəti cəlb edir: "Bunu adi tamaşaçı da hiss edir, burada gizli bir şey yoxdur. Həmçinin, bəzi hallarda sponsor reklamlarının da müvafiq həddən artıq olması, xüsusi kommersiya verilişləri müşahidə edilir. Lakin bu məsələlərdə yayımçıların maddi durumları və teleradio məkanının inkişafı məqsədləri nəzərə alınmaqla, müəyyən güzəştli mövqe tutulur. Çünki teleradio sisteminin tərkib hissəsi olaraq bizim məqsədimiz teleradio yayımçılarını inzibati yolla sıxmaq yox, onların fəaliyyətinə yardımçı olmaqdır. Bu mənada hesab edirik ki, reklam məsələsində müəyyən güzəştli mövqe yayımçıların maddi imkanlarını düzəltmələrinə kömək edə bilər".
T.Dadaşov bildirib ki, bu istiqamətdə güzəştlər daim olub:
"Yayımçılar bunu hiss edib. Lakin əlbəttə ki, bu ona əsas vermir ki, yayımçılar efirlərində kommersiyalaşmaya getsinlər. Şura efirdə daha ciddi, ictimaiyyəti narahat edən problemlərin olmamasına diqqət yetirir, belə hallar olduqda dərhal reaksiya verir". Azərbaycan Reklamçılar İttifaqı İctimai Birliyinin sədri Hacıəmi Atakişiyev "Bakı-Xəbər"ə açıqlamasında qeyd etdi ki, televiziya yayımını aparanlar əksər hallarda reklamla bağlı qanunu pozur. Reklam haqqında qanunda televiziya ilə bağlı 3-4 maddə qeyd olunub.
H.Atakişiyevin fikrincə, MTRŞ vəziyyətdən çıxış yolu kimi qanuna əlavələr üzrə təkliflər hazırlamalıdır: "Hazırlanan təkliflər Milli Məclisə göndərilməli və ardınca Prezident baxmalıdır. Radio sahəsində də reklam məsələsinə xüsusi diqqət ayrılmalıdır. Eyni zamanda, internet televiziyası da bir blokda olmalıdır ki, nəzarət işi rahat olsun".
Həmsöhbətimiz hesab edir ki, reklamla bağlı qanunvericiliyin tələblərinin bəzi yayımçılar tərəfindən pozulması qanunvericilikdə olan boşluqdan irəli gəlir.
Günel CƏLİLOVA
