İlqar Orucov: "Azərbaycanda şöbə müdirlərinin işə imtahan vasitəsilə qəbulu bu istiqamətdə ilk islahatdır"
İyulun 10-da Dövlət İmtahan Mərkəzi (DİM) tərəfindən "Dövlət qulluğuna dair qanunvericiliyin tətbiqində dövlət orqanlarının fəaliyyətinin təkmilləşdirilməsi" mövzusunda konfrans keçirilib. Konfrans zamanı bir sıra məsələlər müzakirə olunub.
Konfransda iştirak edən DİM-in hüquqi təminat və insan resursları şöbəsinin müdiri Vüqar Əsgərov təqdimatında dövlət qulluğuna qəbulda və inzibati vəzifələrin tutulmasında edilmiş dəyişikliklər və qanunvericiliyin tətbiqi üzrə yol verilən pozuntular, həmin pozuntuların aradan qaldırılması üzrə mərkəzin fəaliyyətindən danışıb. O qeyd edib ki, qanunvericilikdə edilmiş əsas dəyişiklik dövlət qulluğuna qəbul sisteminin əhatə dairəsinin genişləndirilməsi olub: "Belə ki, əgər bundan əvvəl müsabiqə ilə qəbul yalnız 5-7-ci təsnifata daxil olan inzibati vəzifələrə şamil olunurdusa, artıq yeni dəyişikliklərə əsasən, dövlət qulluğuna qəbul 1-7-ci təsnifata aid inzibati vəzifələr üzrə aparılacaq. Yəni dövlət qulluğunda yüksək vəzifə (dövlət orqanında xidmət rəisi, aparat rəhbəri, şöbə müdiri vəzifələri) tutmaq istəyən şəxslər də müsabiqədən keçməli olacaq. Dövlət qulluğuna qəbulda edilən digər mühüm dəyişiklik sertifikasiya sisteminin tətbiqi olub".
Dövlət qulluğuna qəbul sisteminin əhatə dairəsinin genişləndirilməsinin müsbət nəticə verəcəyini ekspertlər də düşünür. Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov "Bakı-Xəbər"ə açıqlamasında qeyd etdi ki, dövlət qulluqçularının mərkəzləşmiş formada imtahan verərək işə qəbul olunması müasir və savadlı kadr deməkdir: "Dövlət qulluqçularının işə qəbulu mütəxəssislər tərəfindən aparılan imtahanla həyata keçirilir. Lakin şöbə müdirləri, müvafiq mərkəzi icra hakimiyyəti orqanlarının aparat rəhbərləri və digər yüksək vəzifəli dövlət qulluqçuları isə imtahandan kənarda qalırdı. Azərbaycanda şöbə müdirlərinin işə imtahan vasitəsilə qəbulu bu istiqamətdə ilk islahatdır. İdarəetmənin təkmilləşdirilməsi, savadlı kadrların işə cəlb olunması istiqamətində atılan bir addımdır. Nəzərə almaq lazımdır ki, ölkə başçısı İlham Əliyevin imzaladığı xaricdə təhsillə bağl Dövlət Proqramı xətti ilə minlərlə savadlı gənc xarici ölkələrdə təhsil alıb. Onlar kifayət qədər savadlı kadrlardır. O cür kadrlar Dövlət İmtahan Mərkəzi tərəfindən dövlət qulluğuna qəbul məqsədilə keçirilən imtahan prosesindən daha çox yararlana biləcək. Beləliklə, dünyagörüşlü, müasir savadlı kadrlar mərkəzi icra hakimiyyəti orqanlarında işə qəbul olunacaq. Bundan yalnız Azərbaycan dövləti qazanacaq".
Günel CƏLİLOVA
