Ağdaş Rayon Polis Şöbəsinin rəhbərliyinin təşəbbüsü ilə polis veteranları Xosrov kəndindəki İ.Ələsgərov adına tam orta məktəbdə şagirdlərlə görüş keçiriblər. RPŞ-nin veteranlar şurasının sədri Elman Qurbanov və şuranın üzvləri "Azyaşlılar və yeniyetmələr arasında baş verə biləcək hüquq pozuntularının və cinayət hadisələrinin qarşısının alınmasında qabaqlayıcı tədbirlər" mövzusunda çıxışlar edib, şagirdlərə hüquqazidd əməllərin fəsadları, ictimai qayda pozuntularına səbəb olan hallar və onların nəticələri, eləcə də narkotiklərin insan orqanizminə zərəri, dini ekstremizmə qarşı mübarizə, yol hərəkəti təhlükəsizliyi barədə ətraflı məlumatlar veriblər.
Qanunlara riayət etmək məsuliyyətinin yeniyetməlik dövründən başlandığını qeyd edən polis veteranları gənclərə sağlam ruhda, vətəninə, xalqına layiqli vətəndaş kimi yetişmələrinin, vətənpərvərlik ruhunda tərbiyə olunmalarının əhəmiyyətindən danışıb, öz tövsiyələrini veriblər.
Qeyd edək ki, Ağdaş Rayon Polis Şöbəsinin Veteranlar Şurası cari ilin 6 ayı ərzində şəhərin ictimai kollektivlərində və ümumtəhsil məktəblərində 35 görüş keçirib, maarifləndirici söhbətlər aparıblar.
Polis veteranları cinayətkarlıqla mübarizədə də öz səylərini əsirgəməyib, 65 cinayətin açılmasında yaxından iştirak ediblər.
Natiq CAVADOV DİN mətbuat xidmətinin əməkdaşı
