Məlahət Mürşüdlü: "Müəllimlərin vergi ödəyicisinə çevrilməsi repetitorların fəaliyyətinə keyfiyyət baxımından mənfi təsir etməyəcək"
"Fərdi repetitorluq sahibkarlıq fəaliyyəti hesab edilir və bu fəaliyyətlə məşğul olanlar, fiziki şəxslər kimi, sahibkarlıq fəaliyyətinə başladıqları günədək yaşayış yeri üzrə vergi orqanına müraciət edərək vergi uçotuna alınmalıdır". Bu barədə Vergilər Nazirliyinin Media və Kommunikasiya Mərkəzinin yaydığı məlumatda qeyd olunur.
Məlumatda bildirilir ki, vergi uçotuna alınma kağız daşıyıcısında "Fiziki şəxsin vergi uçotu haqqında ərizə" və ona əlavə olunmuş şəxsiyyəti təsdiq edən sənədin (Azərbaycan Respublikasının vətəndaşları üçün şəxsiyyət vəsiqəsi) surətinə əsasən həyata keçirilir. Kağız daşıyıcısında müraciət şəxsən və ya səlahiyyətli nümayəndə (notarial qaydada təsdiq edilmiş etibarnamə ilə) vasitəsilə vergi orqanına gəlməklə və ya poçt vasitəsilə edilir.
Həmin şəxslər vergi orqanına gəlmədən elektron qaydada da vergi uçotuna alına bilər. Elektron qeydiyyat gücləndirilmiş elektron imza (o cümlədən "Asan İmza") əsasında İnternet Vergi İdarəsi portalı (www.e-taxes.gov.az) vasitəsilə aparılır. Uçota alınma, yenidən uçota alınma, uçotdan çıxarılma ödənişsiz həyata keçirilir.
Vergi uçotuna alınarkən təqdim edilən ərizədə seçilən vergitutma metoduna uyğun olaraq, sadələşdirilmiş verginin, gəlir vergisinin və ya əlavə dəyər vergisinin (gəlir vergisinin ödəyicisi də olmaq şərti ilə) ödəyicisi kimi fəaliyyət göstərə bilər.
Azad Müəllimlər Birliyinin sədri Məlahət Mürşüdlü "Bakı-Xəbər"ə açıqlamasında qeyd etdi ki, repetitorluqla məşğul olan müəllimlərin vergiyə cəlb olunması düzgün qərardır: "Repetitorluqla məşğul olanlar fiziki şəxs kimi qeydiyyatdan keçib vergi ödəyicisi olmalıdır. Müqavilə varsa, vergi də ödəyəcək. Bu, repetitorların fəaliyyətinə keyfiyyət baxımından mənfi təsir etməyəcək".
Repetitorluqla məşğul olan müəllimlərin vergiyə cəlb olunmasının qiymət artımına səbəb olacağına gəlincə, həmsöhbətimiz bunun mümkün olduğunu dilə gətirdi: "Qiymət artımı, əslində, bazara uyğun olaraq təyin olunur. Çox güman ki, növbəti tədris ilində repetitorluqla məşğul olanlar qiyməti qaldıracaq".
Günel CƏLİLOVA
