Şəmsəddin Əliyev: "Respublikanın bütün regionlarında polisdən təqaüdə çıxmış veteranlardan səmərəli istifadə olunmalıdır"
Azərbaycanda polis veteranlarının təcrübəsindən, bilik və bacarıqlarından daha geniş və səmərəli istifadə edilir. Onların ictimai təhlükəsizliyin təminində, cinayətlərin profilaktikası və açılmasında, təqsirləndirilən şəxslərin axtarışı tədbirlərinin planlaşdırılmasında, şəxsi heyətin təlim-tərbiyəsində, peşəkarlığın artırılmasında, əhali arasında hüquqi biliklərin təbliğində fəaliyyəti güclənib.
Son illər ölkənin bütün bölgələrində polis veteranlarının təcrübəsindən istifadə edilir. Bu yöndə qarşılıqlı əlaqələr, işgüzar münasibətlər daha da sıxlaşır. Polisin fəaliyyətində əldə olunmuş qabaqcıl təcrübənin qorunub-saxlanması, daha da inkişaf etdirilməsi məqsədilə veteranların bilik və bacarığından istifadə olunmasına xüsusi əhəmiyyət verilir. Eləcə də xidməti vəzifələrinin icrası zamanı qarşılaşdıqları çətinliklərin öhdəsindən gəlməkdə gənclərə yaxından kömək edirlər. Polis veteranlarının təşkilatlanması, bilik və bacarıqları, peşəkarlığı təmsil olunduqları ərazi polis orqanlarının və nizami hissələrin gündəlik işində də öz müsbət təsirini göstərməkdədir.
Ötən il ərzində respublikanın ərazi polis orqanlarında veteranların iştirakı ilə dörd mindən çox cinayətin açılması təmin olunub. Onların təşəbbüsü ilə təhsil müəssisələrində, gənclər kollektivlərində 2100-ə yaxın tədbir keçirilib. Bu ilin birinci rübü ərzində isə onlar 1550 cinayət hadisəsinin açılmasında iştirak edib.
Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, bu təcrübədən bütün dünya istifadə edir: "Bütün dünyada istefada, təqaüddə olan polis veteranlarından istifadə edilir. Çünki bunlar kifayət qədər peşəkar, təcrübəli insanlardır. Cinayətkarlıqla mübarizənin metod və taktikasını yaxşı bilirlər. Ona görə də təcrübəli polis veteranlarını kənarda qoymaq olmaz. Onların təcrübəsindən istifadə etmək həm təhlükəsizliyin təmin olunmasında, həm axtarışda olan cinayətkarların yaxalanmasında, bağlı qalmış cinayətlərin açılmasında mühüm rol oynaya bilər. Azərbaycan da son on il ərzində bu praktikadan istifadə edir. Hesab edirəm ki, bu yöndə görülən işlərə çox böyük töhfə də verir. Respublikanın bütün regionlarında polisdən təqaüdə çıxmış veteranlardan səmərəli istifadə olunmalıdır. Bu da, təbii ki, cinayətkarlıqla mübarizədə dövlət siyasətinin bariz nümunəsi və həm də daxili işlər orqanlarının fəaliyyətinin əsas istiqamətlərindən biridir".
Vidadi ORDAHALLI
