"JEK" müdiri Qabil Quliyev: "Əraziyə avtobus dayanacağının qoyulması ilə əlaqədar Bakı Şəhər İcra Hakimiyyətinin Mənzil İstismar Departamentinə müraciət etmişəm..."
Redaksiyamıza Qaradağ rayonu, Müşfiqabad qəsəbəsində salınan məcburi köçkün şəhərciyinin sakini, bina 18, mənzil 20-də yaşayan Əsgərov Kamal Musa oğlunun imzası ilə məktub daxil olub. K.Musaoğlu qeyd edir ki, məcburi köçkün şəhərciyində 7000 sakin yaşayır. Onun bildirdiyinə görə, sakinlərin ictimai istifadəsi üçün lazım olan vasitələrdən biri avtobus dayanacağı, məscid və xeyir şər evidir ki, məcburi köçkünlər bunlardan istifadə edə bilmir.
Müraciətdə bildirilir:"Qəsəbə 2013-cü ilin mart ayından məcburi köçkünlərin istifadəsinə verilib. Sakinlərin ictimai istifadəsi üçün vacib olanlardan biri avtobus dayanacağıdır ki, bu günə qədər yoxdur. Təəssüf hissi ilə qeyd etmək istəyirəm ki, qəsəbə sakinləri dəfələrdə aidiyyəti orqanlara və qəsəbəyə gələn səlahiyyətli nümayəndələrə müraciət etsələr də nəticəsi olmayıb. Qarda, yağışda, günəşdə qəsəbə sakinləri daldalanmaq üçün binaların künclərinə, ticarət obyektlərinin örtükləri altına sığınmağa məcbur olur. O ki qaldı məscid və xeyir-şər evinə, onların olması da qəsəbə sakinləri üçün vacibdir. Ona görə ki, qəsəbə sakinlərinin 85-90 faizi işsizdir. Birinin əzizi ölsə, ölü sahibi mərhumu yudurdub kəfənlətmək və namazını qılmaq üçün gərək maşın tutub başqa qəsəbələrə, yaxud şəhər məscidinə aparıb-gətirsin. Bu məsələlərin hamısı da maddiyyatla bağlı olduğu üçün gərək ölü sahibi kimdənsə borc pul alsın və ölüsünü dəfn etsin. Bununla da ölü sahibi ikitərəfli əziyyət çəkməli olur. Birincisi odur ki, ailə yaxını itirir, ikincisi isə, gərək aldığı borcu sahibinə qaytarsın. Xeyir-şər evinə gəldikdə isə, təxminən 2016-cı ilin əvvəlləri olardı xeyir-şər evinin inşasına başladılar. Təəssüflər olsun ki, inşaat maddi problem üzündən yarımçıq qalıb".
Sakin yazır ki, xeyir-şər evinin tikintisinin 75 faizi Ağdam rayonundan seçilmiş millət vəkilinin şəxsi vəsaiti hesabına tikilib, lakin onun tikintisi yarımçıq qalıb. K.Əsgərov qeyd edir ki, hətta ucqar dağ rayonlarında belə, müasir standartlara uyğun dayanacaq quraşdırılıb, amma paytaxtın yaxınlığında yerləşən bir qəsəbədə dayanacaq yoxdur.
Məktub müəllifi qeyd edir ki, 7000-dən artıq sakini olan qəsəbənin ümumi istifadəsi üçün üçün vacib olan avtobus dayanacağı, xeyir-şər evi, məscidi yoxdur:"Qəsəbə üzrə səlahiyyətli nümayəndə, Mənzil Kommunal İstismar Sahəsinin (JEK müdiri) müdiri Qabil Quliyev isə işlədiyi 3 illik müddətdə yuxarıda qeyd etdiyim problemlər barədə aidiyyəti orqanlara heç bir məlumat vermir, müraciət etmir".
Kamal Musa oğlu Əsgərovun redaksiyamıza ünvanladığı məktubda qaldırılan məsələ ilə bağlı Mənzil Kommunal İstismar Sahəsinin müdiri Qabil Quliyev əlaqə saxladıq.
Q.Quliyev "Bakı-Xəbər"ə açıqlamasında sakinin qaldırdığı problemlə tanış olduğunu bildirdi. Onun sözlərinə görə, məcburi köçkünlərin istifadəsi üçün avtobus dayanağının qoyulması ilə bağlı dəfələrlə Bakı Şəhər İcra Hakimiyyətinin Mənzil İstismar Departamentinə müraciət edib:"Sakinlərin narahatlığını başa düşürəm. Bu problemlərlə tanışam və bunun həllinə çalışıram. Əraziyə avtobus dayanacağının qoyulması ilə əlaqədar Bakı Şəhər İcra Hakimiyyətinin Mənzil İstismar Deparmatentinə müraciət etmişəm, özü də dəfələrlə. Dep artamentdən mənə bildiriblər ki, məcburi köçkünlərin istifadəsi üçün vacib olan müasir standartlara cavab verən dayanacaq quraşdırılacaq. Nə zaman quraşdırılacağını isə deməyiblər. Hər dəfə müraciət edəndə "quraşdıracağıq" deyirlər. Demək istəyirəm ki, mən davamlı müraciət edirəm. Xeyir-şər evinə gəlincə, demək olar ki, onun tikintisi başa çatmaq üzrədir, bircə dam örtüyü qalıb. Xeyir-şər evinə gəlib "Qaçqınkom"dan baxıblar, tikintinin tamamlanmasını, tam başa çatmasını plana salıblar. İnşasının nə zaman başa çatacağını bilmirəm. Amma məscid haqqında bir söz deyə bilmərəm. Çünki məscid tikintisi planda yoxdur".
Hər halda biz ümidini mətbuata bağlayaraq səsini qəzet səhifələrindən əlaqədar qurumlara daha tez çatdıracağını düşünən vətəndaşın problemini işıqlandırmaqla ona yardımçı olmağa çalışdıq. Qalanı elə əlaqədar təşkilatların boynuna...
İradə SARIYEVA
