Etibar Əzimov: "Hələlik manatın məzənnəsi stabil olduğundan, qiymət dəyişikliyi barədə düşünmürük"
Natiq Cəfərli: "Ötən illə müqayisədə xammalın qiyməti qalxdığı üçün, məktəbli geyimlərinin qiymətində artım müşahidə oluna bilər"
Dolların məzənnəsinin manata nisbətən bahalaşması bir sıra sahələrdə qiymət artımına səbəb oldu. Belə bir məlumat yayılıb ki, qiymət artımı məktəbli geyimlərinə təsir edəcək.
Məlumat üçün bildirək ki, ötən il Bakı Tikiş Evinin (BTE) tikdiyi məktəbli formalarının qiyməti 8,5 faiz bahalaşmışdı. Aşağı siniflər üçün 26 ölçüdən 44 ölçüyədək məktəbli forması dəstinin qiyməti 34 manatdan 37 manatadək, yuxarı sinif şagirdləri üçün 32 ölçüdən 54 ölçüyədək məktəbli forması dəstinin qiyməti 43 manatdan 46 manatadək artırılmışdı.
Analoji hadisənin bu ildə baş verib-verməyəcəyini öyrənmək məqsədilə Bakı Tikiş Evinin (BTE) satış şöbəsinin rəisi Etibar Əzimova müraciət etdik. E.Əzimovun sözlərinə görə, hələlik məktəbli formalarının qiymətlərində dəyişiklik gözlənilmir: "Biz parçaları Türkiyədən dollarla alırıq. Həmin parçalar yüksək keyfiyyətlidir. Hələlik manatın məzənnəsi stabil olduğundan, qiymət dəyişikliyi barədə düşünmürük. Əgər dollar yenidən bahalaşsa, məcbur qalıb qiymət artımına gedə bilərik".
İqtisadçı-ekspert Natiq Cəfərli qəzetimizə açıqlamasında qeyd etdi ki, BTE-nin istehsal etdiyi məktəbli geyimləri yerli istehsal deyil, xammalın əksəriyyəti xaricdən gətirilir: "Ötən illə müqayisədə xammalın qiyməti qalxdığı üçün, geyimlərin qiymətində artım müşahidə oluna bilər. Belə bir hal baş verə bilər. Məktəbli geyimləri təəssüf ki, yerli istehsal adı ilə tanınır. Xammalın 90 faizdən çoxu xaricdən gətirilirsə, bu, yerli istehsal sayıla bilməz".
Həmsöhbətimizin sözlərinə görə, adıçəkilən tikiş fabriki inhisarçıya çevrilib. Fabrik məktəblərə göstəriş verir ki, geyim sırf BTE-dən alınmalıdır. Bu isə düzgün deyil: "Valideynlər məktəbli geyiminin formasına uyğun olaraq istədikləri dükandan ucuz və keyfiyyətlisini ala bilər. Hətta geyim sexlərində belə eyni paltardan tikdirə bilər".
Günel CƏLİLOVA
