Aynur Əliyeva: "Körpə ilk günlərindən ana südü ilə qidalandıqda onun mədə-bağırsaq sisteminin florası yaranır, bu da uşağın sonrakı həyatı üçün çox önəmlidir"
Yeni doğulan uşaqların ana südü ilə qidalanması dəfələrlə müzakirə mövzusu olub. Bu məsələ ilə bağlı aidiyyəti şəxslər uşaqların yalnız ana südü ilə qidalanmasının vacibliyini qeyd edib. Təəssüf ki, yeni ana olanların bir qismi ana südünə deyil, hazır uşaq qidalarına üstünlük verir.
İyulun 4-də Milli Məclisin Səhiyyə komitəsinin sədri akademik Əhliman Əmiraslanov UNİCEF-in Azərbaycan Nümayəndəliyinin rəhbəri Edvard Karvardini qəbul edərkən məlum məsələ ilə bağlı öz fikrini dilə gətirib. Görüşdə hazırda UNİCEF-in Azərbaycandakı fəaliyyətinin əsas prioritet sahələri olan hamilə qadınlarda müşahidə edilən anemiyanın qarşısının alınması məqsədilə unun zənginləşdirilməsi və yeni doğulan körpələrin müstəsna olaraq ana südü ilə qidalandırılmaması problemləri ətrafında geniş fikir mübadiləsi aparılıb, qeyd edilən istiqamətlərdə birgə layihələr çərçivəsində gələcək fəaliyyət barədə fikirlər səsləndirilib.
Pediatrlar da uşaqların ana südü ilə qidalanmasının vacib olduğunu bildirir. Pediatr Aynur Əliyeva bizimlə söhbətində bildirdi ki,
ana südü uşağın immun sisteminin əsasını qoyur: "Ana südü təkcə qida, kalori, immuniteti möhkəmləndirmək demək deyil. Körpənin ilk andan ana südü ilə qidalandırılması onun sosial, psixoloji baxımdan inkişafı üçün də mühüm əhəmiyyət kəsb edir. İlk süd, yəni doğumdan sonra uşağa verilən süd tərkib etibarilə çox zəngindir. Onun az miqdarında belə yüksək kalori var. Körpənin immun sisteminin əsası həmin an qoyulur. Körpə ilk günlərindən ana südü ilə qidalandıqda onun mədə-bağırsaq sisteminin florası yaranır, bu da uşağın sonrakı həyatı üçün çox önəmlidir. Hər bir qadın, ana bunu dərk etməlidir. Ana övladını südlə qidalandırdıqda ona sağlam gələcək bəxş etmiş olur. Uşağa süd vermək həm də ana ilə körpə arasında doğmalıq bağı yaradır".
Həmsöhbətimizin sözlərinə görə, süni, müxtəlif qarışıqlı qidalarla qidalanan körpələrdə infeksiyalara daha çox rast gəlinir: "Bəzən valideynlər uşaqlara ana südü ilə yanaşı bir sıra süni qidalar, sıyıqlar da verməyə tələsir. Uşağın bunu qəbul etməsinə, çəkisinin artmasına görə hətta sevinirlər. Amma tələsmək lazım deyil. Uşağı hər yaş dövrünə uyğun qidalandırmaq lazımdır. Artıq qidaları körpənin qida rasionuna salmaq düzgün deyil.
Uşağın çox qidalanması, çəkisinin artması hələ onun sağlam olması demək deyil. Sonradan həmin uşaqların səhhətində müxtəlif problemlər, o cümlədən endokrin xəstəliklər yaranır ki, bununla da mübarizə aparmaq çox çətin olur. Qida balansını pozmaq olmaz. Əksər hallarda süni qida ilə qidalanan uşaqların çəkisi daha artıq olur və bu da problemlərə yol açır".
Günel CƏLİLOVA
