Azərbaycan Polisinin 99-cu ildönümü ərəfəsində tikilib istifadəyə verilmiş Xətai Rayon Polis İdarəsinin yeni inzibati binasında polis veteranları ilə gənc əməkdaşların görüşü keçirildi.
Veteranları və gənc əməkdaşları hərarətlə salamlayan, onları bir neçə gün öncə qeyd olunan 2 İyul Azərbaycan Polisi günü münasibətilə təbrik edən İdarənin rəisi, polis polkovniki Muradəli Babayev çıxışına ulu öndər Heydər Əliyevin "Veteranlara qayğı göstərmək, hörmət etmək, onların bütün problemlərini həll etmək bizim dövlətin və hər bir dövlət orqanının, hər bir namuslu Azərbaycan vətəndaşının borcudur" fikri ilə başladı.
M.Babayev Azərbaycanın sabitlik adası kimi bütün dünyanın diqqət mərkəzində olduğunu və məhz bunun nəticəsi olaraq beynəlxalq tədbirlərin, idman yarışlarının ölkəmizdə keçirildiyini, dilindən, dinindən asılı olmayaraq hər kəsin sülh və əminamanlıq şəraitində yaşadığını, multikulturalizmin insanları birliyə və bərabərliyə çağıran ən ali dəyər kimi qorunub-saxlandığını da diqqətə çatdırdı.
Ölkəmizin və daxili işlər orqanlarının həyatında veteranların xüsusi rolu olduğunu vurğulayan rəis bildirdi ki, məktəblərdə, əmək kollektivlərində paytaxtda və yerlərdə narkomaniya, erkən nikah və dini radikalizm mövzusunda keçirilən tədbirlərdə veteranların verdiyi dəstək əldə olunan nailiyyətləri daha da davamlı edir.
Bakı Şəhər Baş Polis İdarəsi rəisinin Şəxsi Heyətlə iş üzrə böyük köməkçisi, polis polkovniki Əli Vəliyev vurğuladı ki, bu gün respublikada polis veteranı hərəkatını gücləndirmək, ölkədə əminamanlığın qorunmasını, cinayətkarlığa qarşı qətiyyətli mübarizəni təmin etmək, cəmiyyətdə polis haqqında müsbət rəyin formalaşmasında iştirak etmək, onların təcrübəsindən yararlanmaq, eləcə də onların öz problemlərinin həllində kömək göstərmək məqsədilə görülən tədbirlər DİN rəhbərliyinin xüsusi nəzarətindədir.
DİN Veteranlar Şurasının sədri Fərhad Süleymanov belə tədbirlərin keçirilməsində xüsusi həssaslıq göstərən, həm peşə borcuna sadiq olan, həm də vətəndaş mövqeyi nümayiş etdirərək cəmiyyətdə baş verən bəzi neqativ halların qarşısının alınmasında, xüsusilə də DİN rəhbərliyinin diqqət yetirdiyi əsas prioritetlərdən biri kimi gənclərlə işin qurulmasında polis veteranlarının təcrübəsindən yararlanan, mütəmadi olaraq məktəblərdə, müxtəlif əmək kollektivlərində belə vacib görüşlər təşkil edən İdarə rəisinə öz təşəkkürünü bildirdi. Dedi ki, ölkəmizdə gənclərin sağlam, intellektual səviyyəli inkişafı həmişə dövlətin diqqət və qayğısı ilə əhatə olunub. Ölkə gənclərinin vətənpərvərlik ruhunda tərbiyə edilməsi və dövlətçiliyə sədaqət ruhunda yetişməsi üçün biz polis veteranlarının da üzərinə böyük məsuliyyət düşür.
Qonaq qismində dəvət olunmuş Nərimanov RPİ-nin Veteranlar Şurasının sədri, 83 yaşlı Paşa Kərimov polis orqanları rəhbərlərinin veteranlarla işə verdikləri önəmin faydasından söz açdı və xidmətdə olan həmkarlarımıza cinayətkarlıqla mübarizədə, asayişin qorunmasında yaradılmış şəraitdən, ali diqqət və qayğıdan məmnunluğunu bildirdi.
Bakı Şəhər Baş Polis İdarəsinin Veteranlar Şurasının sədri Emin Məmmədov polis veteranlarının gənc nəslin vətənpərvərlik ruhunda tərbiyəsinə böyük önəm verdiklərindən söhbət açdı, yetişən gənc nəslin əldə etdiyi uğurlarda onların da payı olduğunu diqqətə çatdırdı.
Xətai RPİ Veteranlar Şurasının sədri Nazim Xıdırov bir zamanlar daxili işlər orqanlarında üzləşdikləri çətinliklərdən danışdı. Qeyd etdi ki, bu gün polisin işləməsi üçün dövlətimiz tərəfindən hər cür şərait yaradılıb. DİN hər cür texniki vasitə, avadanlıqla təchiz olunub.
Sonra digər çıxış edənlər bu tədbirin veteranlarla gənc əməkdaşlar arasındakı bağlılığın daha da möhkəmlənməsinə xidmət etdiyini dedilər.
Daha sonra Respublika Veteranlar Şurası adından polis polkovniki Muradəli Babayevə "Əliağa Şıxlinski" medalı təqdim olundu.
Tədbirə yekun vuran rəis, polis polkovniki Muradəli Babayev daxili işlər orqanlarının qarşısında duran vəzifələrin yerinə yetirilməsində, hüquqi biliklərin təbliğində, cinayətlərin açılmasında, profilaktikasında, təhlükəsizliyin təminində veteranların təcrübəsindən, ictimai nüfuzundan, bilik və bacarıqlarından bundan sonra da yararlanacaqlarını vurğuladı.
Sonda veteranlarla birlikdə xatirə şəkli çəkdirildi.
Hafiz TƏMİROV polis mayoru
