Nadir İsrafilov: "Peşə məktəblərinin infrastrukturunun yararsız vəziyyətdə olması səbəblərindən biri həmin tədris ocaqlarında vaxtilə məcburi köçkünlərin yaşamasıdır"
Bu gün Bakı şəhərində yerləşən peşə təhsili müəssisələrinin əksəriyyətinin infrastrukturu ürəkaçan vəziyyətdə deyil. Peşə məktəblərinin 90 %-də qaçqın və məcburi köçkünlər yerləşib.
Peşə məktəblərinin infrastrukturunun bərbad halda olmasını Təhsil Nazirliyi yanında Peşə Təhsili üzrə Dövlət Agentliyinin direktoru Famil Mustafayev də mediaya açıqlamasında qeyd edib. O bildirib ki, bu gün peşə təhsili müəssisələrinin 80 %-nin infrastrukturu köhnədir: "Peşə məktəblərində olan avadanlıqların çoxu köhnəlib. Hesab edirəm ki, infrastruktur dedikdə bina, təmir, texnika - ümumilikdə hamısı nəzərdə tutulur. Hazırda peşə təhsili müəssisələrinin maddi-texniki bazasının yenilənməsi ilə bağlı işlər görülür. Ayrı-ayrı məktəblər təmir olunduqca, ora yeni texnikalar verilir. Bu gün maddi-texniki baza kifayət qədər müasir tələblərə cavab vermir".
Xatırladaq ki, Prezident İlham Əliyev Saatlıda pambıqçılığın inkişafı məsələlərinə dair respublika müşavirəsindəki yekun nitqində kadr hazırlığının böyük əhəmiyyət daşıdığını vurğulayıb: "Ümumiyyətlə, növbəti illərdə peşə hazırlığı Azərbaycanda geniş vüsət almalıdır və buna böyük ehtiyac var. Peşə məktəblərinin yaradılması prosesi gedir, daha da sürətlə getməlidir. Bu proses iqtisadiyyatın ümumi inkişafı ilə uzlaşmalıdır. Biz iqtisadi inkişafımızı planlaşdırırıq. Bizim regional inkişaf proqramlarımız dərc olunur. Yəni biz öz beşillik fəaliyyət planımızı tərtib edirik və eyni zamanda, sənaye, kənd təsərrüfatı və digər sahələrlə bağlı proqramlar bizə yol göstərir. Ona görə peşə hazırlığı buna uyğun şəkildə aparılmalıdır. Nə qədər və hansı istiqamətdə peşə məktəbləri olmalıdır? Kənd təsərrüfatı, sənaye, turizm sahələrində ixtisaslaşmış peşə məktəblərinin yaradılmasına böyük ehtiyac var, çünki bu sahələr bundan sonra da Azərbaycanda sürətlə inkişaf edəcək".
Təhsil eksperti Nadir İsrafilov "Bakı-Xəbər"ə açıqlamasında bildirdi ki, peşə məktəblərinə diqqətin artırılması məsələsi dəfələrlə gündəmə gəlib. Hətta bu məsələyə ölkə başçısı İlham Əliyev də toxunub.
N.İsrafilovun sözlərinə görə, sovet dönəmində peşə məktəbi 3 quruma həvalə olunmuşdu: "Maarif Nazirliyi (məktəbəqədər təhsil, bağça, orta məktəb), Ali İxtisas və Orta Təhsil Nazirliyi (ali məktəb, texnikum) və Dövlət Texniki Peşə Komitəsi olub. O zamanlar təhsil 3 müstəqil qurum tərəfindən idarə olunurdu. Texniki peşə hazırlığına Dövlət Texniki Peşə Komitəsi nəzarət edirdi".
Həmsöhbətimizin sözlərinə görə, Təhsilə dair Dövlət Strategiyasında və digər dövlət əhəmiyyətli sənədlərdə də peşə təhsilinə diqqətin artırılması xüsusi olaraq qeyd olunub: "Texniki peşə məktəblərinin inkişafı üçün peşə sahəsinə olan münasibət dəyişməlidir. Hazırda orta məktəbi bitirən şəxslər peşə məktəbinə deyil, ali məktəbə qəbul olunmaq istəyir".
Ekspert onu da bildirdi ki, peşə məktəblərinin infrastrukturunun yararsız vəziyyətdə olması səbəblərindən biri həmin tədris ocaqlarında vaxtilə məcburi köçkünlərin yaşamasıdır. O məktəblərin yenidən təmir olunmasına ehtiyac var.
Günel CƏLİLOVA
