İlqar Hüseynli: "Xarici ölkələrdə də narkotik istifadəçiləri xəstəxanaya göndərilir və müalicə bitdikdən sonra sağlam həyatına qayıdır"
Azərbaycan Respublikasının Cinayət Məcəlləsinə kompleks dəyişikliklər ediləcək. Bununla bağlı qanun layihəsi ötən həftə Azərbaycan Respublikasının Prezidenti tərəfindən qanunvericilik təşəbbüsü qaydasında Milli Məclisə göndərilib.
Qanun layihəsində nəzərdə tutulmuş konseptual məsələlərdən biri də cinayət qanunvericiliyində narkotik vasitələrin əldə edilməsi və saxlanması cinayəti törətmiş şəxslərə qarşı münasibətin dəyişdirilməsidir. Bu şəxslər ilk növbədə narkomanlıq xəstəliyinə düçar olmuş insanlar kimi qəbul edilir. Satış məqsədi olmadan narkotik vasitə əldəetmə cinayəti törətmiş, əməlində başqa cinayət tərkibi olmayan, narkomanlıq xəstəliyinə düçar olmuş şəxsə stasionar qaydada tibbi xarakterli məcburi müalicə tədbirləri tətbiq edilir. Şəxs sağaldıqda isə cinayət məsuliyyətindən azad edilir. Bu qaydada məsuliyyətdən azad edilmək imkanı şəxsə yalnız bir dəfə verilir. Müalicədən yayınan şəxslər cinayət məsuliyyətinə cəlb edilir.
Sosial sahə üzrə ekspert İlqar Hüseynli bizimlə söhbətində bildirdi ki, narkotik vasitələrin əldə olunması və ya saxlanması cinayətini törədən şəxslər cinayətkar kimi tanınmamalıdır: "Belə bir məsələ ilə bağlı Prezidentin qanun layihəsini Milli Məclisə göndərməsi təqdirəlayiqdir. Nəzərə almaq lazımdır ki, bu şəxslər cəmiyyət üçün təhlükəli deyil. Onlar narkotik istifadə etməklə öz sağlamlığına zərər yetirir. Bu səbəbdən də onların cinayət məsuliyyətinə cəlb olunması deyil, sağalması üçün xəstəxanaya göndərilməsi daha məqsədəuyğundur. O şəxslər sağalandan sonra narkotikin necə təhlükəli olduğunu dərk edəcək və özü ondan uzaqlaşacaq. Xarici ölkələrdə də narkotik istifadəçiləri xəstəxanaya göndərilir və müalicə bitdikdən sonra sağlam həyatına qayıdır. Tək-tük hallarda müalicəsi bitən şəxs yenidən narkotikə aludə olur. Ancaq əksərən müalicəsi bitən şəxs narkotikdən ömürlük uzaqlaşır və yaxınlarını da bu bəladan uzaq tutmağa çalışır".
Günel CƏLİLOVA
